Gjykata ka shpallur vendimin për sherrin që ndodhi mes OTR e BabaStars më 13 shtator të vitit 2016, para hotelit “Swiss Diamond.
Rigels Rajku i njohur si Noizy është dënuar me dy mijë euro gjobë për incidentin ku mbeti i plagosur në qendër të Prishtinës.
Ndërkohë, Albert Krasnqi personi i akuzuar për plagosjen e Noizy-t është dënuar me 6 muaj burgim me mundësinë që dënimin ta shlyejë me para.
Vendimi i gjykatës i shpallur sot i ngarkon Krasniqit edhe një dënim shtesë prej 8 mijë eurosh për veprat e tjera në aktakuzë.
Shpallja e gjykimit është bërë në një seancë ku dy të akuzuarit nuk kanë marrë pjesë.
Si ndodhi sherri:
KALLXO.com ka arritur të sigurojë aktakuzën në të cilën prokuroria ka shpjeguar veprimet e të gjithë pjesëmarrësve në këtë përleshje.
Noizy i ishte vërsulur fizikisht Albert Krasniqit dhe Ylber Abdullahut (Cozman-it), pasi këta të fundit kishin mbërritur në parkingun e hotelit ku ndodhej reperi.
Aktakuza thotë se Noizy fillimisht i është vërsulur Cozman-it, të cilin e ka goditur me grusht në pjesën e tëmthit dhe e ka shtyrë në automjet.
Kjo më pas u bë shkas për rrahjen masive mes palëve. Më poshtë mund të shihni videon e plagosjes dhe neutralizimit të situatës nga policia.
