Të gjithë shoferët që kanë gjoba të papaguara apo u skadon afati i kolaudimit të mjetit gjatë kësaj periudhe, nuk do të penalizohen derisa situata të rikthehet në normalitet.
Sipas një njoftimi zyrtar nga drejtori i DPSHTRR, Blendi Gonxhe, gjithçka do të pezullohet dhe llogaritja do të nisë sërish në momentin e hapjes së sporteleve.
“Çdo afat skadence i taksave apo rinovimet e lejeve të drejtimit do të pezullohet dhe do llogaritet nga momenti i hapjes së sporteleve.
Çdo afat e çdo skadencë, mbi taksat e qarkullimit të mjeteve rrugore dhe çdo dokumenti tjetër të lëshuar nga DPSHTRR, që nuk mundësohet dot si rinovim ose lëshim vetëm online dhe që konsiderohen prekluzive, do të pezullohen këto afate dhe kur të hapen sportelet do nisë llogaritja e ditëve të mbetura nga dita që u ndërpre zyrtarisht shërbimi.
Pra askush të mos ketë stres, as shqetësim për kamata a gjoba! Edhe për kolaudimin, ditët kur shërbimi është i mbyllur, edhe për ata, nuk do quhen vonesë e qytetarit ose pengesë për ta!”.
