“Lum ato që kanë motra”. Kështu është shprehur këngëtarja Rozana Radi në lidhje me atë që ajo e quan nënën e saj të dytë, motrën Andeta.
Për herë të parë ajo ka folur për marrëdhënien që ka me të motrën. E ftuar në emisionin e Rudinës në Tv Klan, Rozana u shpreh se me motrën ka kaluar shumë gjëra të bukura e të trishta bashkë, por janë bërë edhe më të forta nga goditjet e jetës:
“Andeta është si një nënë e dytë për mua. Ne çdo gjë e ndajmë bashkë, çdo gjë e kemi bashkë. Mund t’ju duket çudi, por edhe llogarinë bankare e kemi të përbashkët. Jam shumë e lumtur që prindërit më kanë dhuruar një motër dhe lum ato që kanë motra… “, thotë Rozi për Andetën.
Në një videomesazh të përgatitur enkas, Andeta, si rrallëherë, foli për marrëdhënien me të motrën:
“Si gjithmonë, unë lë punët e mia për të bërë punët e tua… Kemi kaluar shumë gjëra bashkë, kemi kaluar momente të dhimbshme, siç ka qenë humbja e prindërve. Ti je gjithçka për mua… Ne kemi një zemër që rreh njësoj. Ti kërkon gjithmonë vëmendje, madje ma ke kërkuar edhe kur më thua “jam unë e para, pastaj fëmijët e tu…” Ti je dhe do të jesh gjithmonë e para. Edhe atëherë kur më mërzit shumë, aq sa nuk di ç’të bëj nga nervat. Por kush ka motër, e di se sa e madhe është dashuria… Ti për mua je dashuria më e madhe.”
E përlotur nga mesazhi i së motrës, Rozi tha se ishte hera e parë për të që e dëgjonte Andetën të jepte një mesazh të tillë publikisht. Por ajo nuk i ka qejf surprizat:
“Nuk do të doja t’i dëgjoja këto, sepse e di sa shumë probleme i kam sjellë. Ajo e di shumë mirë që unë nuk i kam qejf surprizat… Kështu që e di se çfarë e pret pas kësaj”, tha Rozi me të qeshur, pa harruar të thotë se ndihet keq për të gjitha herët kur e ka mërzitur të motrën: “Por nuk do t’i kërkoj falje, sepse unë kështu jam…”.
