Muzika rep dhe thirrjet e mbështetësve mbushnin atmosferën në një tubim elektoral në distriktin Chitwan të Nepalit, ku qindra njerëz ishin mbledhur për të mbështetur kandidatin për kryeministër, Balendra “Balen” Shah. Reperi 35-vjeçar, i cili u bë i njohur fillimisht në skenën muzikore dhe më pas në politikë, po përpiqet të sfidojë establishmentin politik të vendit.
Në tubim dëgjohej një këngë fushate e krijuar me inteligjencë artificiale, ku mesazhi kryesor ishte: “Koha mbaroi për udhëheqësit e rremë, loja ka përfunduar. Do të biem kambanën më 5 mars.” Turma, e përbërë nga njerëz të të gjitha moshave, brohoriste vazhdimisht emrin “Balen”, ndërsa banderola gjigante me figurën e tij – gjithmonë me syze dielli të zeza dominonin skenën e tubimit.
Balen Shah po kandidon për postin e kryeministrit vetëm tre vite pasi u zgjodh kryetar bashkie i Katmandus, kryeqytetit të Nepalit. Kandidatura e tij po shihet si pjesë e një gare të rëndësishme mes elitës politike tradicionale dhe një brezi të ri politikanësh që po kërkojnë ndryshim. Partia e tij, Rastriya Swatantra Party (RSP), u rendit e katërta në zgjedhjet parlamentare të vitit 2022. Megjithatë, zhvillimet e fundit politike kanë rritur mbështetjen për figura të reja.
Në shtatorin e kaluar, protesta të mëdha të udhëhequra nga të rinjtë shpërthyen në Nepal kundër korrupsionit dhe mungesës së mundësive ekonomike. Demonstratat u bënë aq të fuqishme sa detyruan kryeministrin e atëhershëm KP Sharma Oli të japë dorëheqjen.
Shumë të rinj shpresojnë që Balen Shah të përfaqësojë një ndryshim të vërtetë.
“Ne nuk duam që të njëjtat parti të vjetra të sundojnë vendin tonë,” thotë Ispa Sapkota, 20 vjeç, një nga pjesëmarrëset në tubim. “Ne protestuam sepse donim ndryshim.”
Për më shumë se 30 vite, politika nepaleze është dominuar nga tre parti kryesore:
- Partia Komuniste e Nepalit (UML)
- Partia Komuniste Maoiste (Qendra)
- Kongresi Nepalez
Koalicionet e brishta qeveritare kanë bërë që asnjë qeveri të mos përfundojë një mandat të plotë për dekada.
Analisti politik Nishchal N. Pandey e cilëson votimin si një moment historik.
“Njerëzit janë lodhur nga të njëjtat fytyra të vjetra. Këto zgjedhje mund të jenë një përballje brezash mes Gjeneratës Z dhe politikanëve që dominojnë që nga vitet ’90,” tha ai për BBC.
Në zgjedhjet e këtij viti pritet të marrin pjesë rreth 19 milionë votues, ndërsa mbi 915 mijë prej tyre do të votojnë për herë të parë.
Një nga mesazhet kryesore të fushatës së Shahut është krijimi i vendeve të punës, në një kohë kur papunësia tek të rinjtë në Nepal arrin 20.6%, ndër më të lartat në Azinë Jugore sipas Bankës Botërore.
Megjithatë, kandidatura e tij nuk ka kaluar pa kritika. Gjatë mandatit si kryetar bashkie, organizatat e të drejtave të njeriut e kanë akuzuar për përdorim të ashpër të policisë ndaj shitësve ambulantë gjatë përpjekjeve për të liruar rrugët e kryeqytetit nga bizneset pa licencë.
Shah gjithashtu ka shmangur shpesh intervistat me median, duke preferuar të komunikojë me votuesit përmes rrjeteve sociale. Kritikët thonë se kjo strategji i lejon të shmangë pyetjet e vështira.
Në zgjedhje, Shah po garon drejtpërdrejt kundër ish-kryeministrit KP Sharma Oli në zonën zgjedhore Jhapa-5, e konsideruar për vite një bastion i fortë i Olit. Megjithatë, kujtimi i protestave të dhunshme ku 77 persona humbën jetën, shumë prej tyre protestues të qëlluar nga policia vazhdon të ndikojë në opinionin publik.
Oli ka deklaruar se dëshiron të “kuptojë ndjenjat e brezit të ri” dhe premton se do të punojë për zhvillimin e vendit dhe forcimin e sovranitetit, paqes dhe demokracisë në Nepal.
Analistët besojnë se nëse një figurë e re si Balen Shah arrin të mposhtë një politikan veteran si Oli, kjo do të përbënte një ndryshim të madh në politikën e Nepalit.
Pas dekadash paqëndrueshmërie politike, një rezultat i tillë mund të shënojë fundin e dominimit të elitës së vjetër dhe të hapë rrugën për një brez të ri liderësh.
Votimi do të tregojë nëse të rinjtë e Nepalit kanë arritur të bindin pjesën tjetër të vendit se është koha për një ndryshim të madh politik dhe për një të ardhme të formësuar nga një brez i ri politikanësh.
