Një vit më parë, e mitura 7-vjeçare Jonada Avdia, u përplas për vdekje me skaf nga ish polici Arjan Tase, ndërsa po pushonte me familjen në Potam të Himarës.
Jonada me origjinë nga Tropoja kishte ardhur me pushime me prindërit e saj, të cilët prej më shumë se dy dekadash jetonin në Angli.
Ngjarja tronditi opinionin publik në të gjithë Shqipërinë, që u ngrit në protesta për javë me radhë. Për këtë ngjarje është shkarkuar i gjithë zinxhiri drejtues i Policisë Kufitare të Vlorës, si edhe inspektorët përgjegjës.
Më 11 korrik Prokuroria e Vlorës mbylli hetimet për ngjarjen tragjike të Himarës dhe doli në përfundim se ngjarja ka ndodhur si pasojë e mosrespektimit nga ana e drejtuesit të mjetit lundrues Arjan Tase të zonës së përcaktuar për notarë si dhe manovrës së gabuar në drejtimin e mjetit.
Arjan Tase akuzohet për veprën penale të “Vrasje me dashje” në mënyrë indirekte parashikuar nga neni 76 i Kodit Penal. Për tetë personat e tjerë, të cilët janë punonjës të policisë kufitare dhe të bashkisë Himarë është ngritur akuza e “shpërdorimit të detyrës”.
Mirëpo, një vit pas vdekjes së Jonadës, situata në bregdetin shqiptar vazhdon të jetë shqetësuese dhe siguria lë shumë për të dëshiruar.
Këtë sezon u regjistruan të tjera humbje jete si pasojë e neglizhencës së qeverisë për të vendosur të paktën roje plazhi, ndërsa rregullat vazhdojnë të mos zbatohen pasi shumë pranë bregut janë parë sërish mjete motorike lundrimi, që rrezikojnë seriozisht jetën e qytetarëve.
