Para disa kohësh, Harry dhe Meghan Markle zhvilluan intervistën e tyre për “Oprah”, ku folën për herë të parë pa dorashka duke rrëfyer detaje që askush nuk i dinte.
Ndër të tjera, princ Harry dhe Meghan Markle pretenduan se u martuan në fshehtësi tre ditë para ceremonisë madhështore zyrtare, mirëpo kjo deklaratë u hodh poshtë nga certifikata e tyre e martesës.
Së fundmi është zbuluar për herë të parë certifikata e dasmës së çiftit nga Zyra e Regjistrimit të Përgjithshëm, e cila tregonte se më 19 maj 2018 dyshja u martuan në një ceremoni luksoze në Kalanë Windsor.
“Më vjen keq, por Meghan është qartë e konfuzuar dhe keqinformuar. Licenca speciale që hartova iu mundësoi atyre që të martoheshin në Shën George’s Chapel në Windsor dhe ajo që ndodhi me 19 Maj dhe që u pa nga miliona njerëz në të gjithë botën, ishte dasma zyrtare e njohur nga ligji dhe Kisha e Anglisë”, tregoi ish nëpunësi, Stephen Borton për “The Sun”.
Kujtojmë se në hyrje të intervistës së bujshme, Meghan Markle rrëfen se i dukej vetja si personazh i një tregimi, pasi hyri në mënyrë tepër naive në familjen mbretërore, pa mësuar asgjë më herët për ta.
Intervista vazhdoi me rrëfimin e sinqertë të çiftit dhe të vërtetat e bujshme që dolën sheshit, ndërsa e gjithë bota i ka vendosur në qendër të vëmendjes.
