Kuzhina e tij është një shëtitje e gjatë ndërkombëtare, që ndalesën e radhës, për fatin tonë, e ka pikërisht në Tiranë. Një sfidë me vetveten e ka sjellë shefin italian me famë ndërkombëtare Loris Marinetto në kryeqytet, me restorantin që po sjell një eksperiencë tërësisht të re kulinarie për adhuruesit shqiptarë të kuzhinës së mirë: “Attimi by Loris” (Shiko këtu).
“Dua të sjell një kuzhinë të re në Shqipëri, pasi mendoj se duke qenë një vend në zhvillim të vazhdueshëm, e tillë është dhe shija e shqiptarëve për ushqimin: janë gjithnjë në kërkim të diçkaje të re e të papritur. Të gjithë më këshilluan të mos e bëja, por unë e kuptova sapo shkela në Shqipëri se ky vend ka diçka speciale, ndaj vendosa të hap restorantin tim në Tiranë.”- shprehet shef Loris Marinetto për “iconstyle.al”.
Për botën e kulinarisë, Loris Marinetto nuk është aspak një emër i ri, duke qenë se talenti i tij në kuzhinë e ka çuar në disa prej restoranteve më të famshme në botë si “Le Calandre” (Padova) me plot 3 yje Michelin, restoranti më i famshëm italian në SHBA “Casa Tua” (Miami), “Cipriani” (Venezia), “Le Maree” (Monte Carlo), “Hotel Palace Copacabana” ( Rio de Janeiro) etj.
Teksa është zhytur kokë e këmbë në rregullimet e fundit për hapjen e madhe, Loris na rrëfen se dashuria e tij për ushqimin është diçka që ka lindur me të.
“Në familjen time, të gjithë janë marrë me restorante dhe kanë punuar në kuzhinë. Tezja, xhaxhai dhe nëna ime gatuajnë në mënyrë të shkëlqyer dhe unë jam rritur duke shijuar ushqime të shijshme.”-shprehet ai.
Mirëpo, po të mos kishte qenë një vendim i marrë instiktivisht vetëm një natë përpara fillimit të shkollës, sot, Loris Marinetto mund të kishte qenë diçka tërësisht ndryshe: teknik dentar!
“Duke qenë se në familjen time të gjithë merren me kuzhinë, mendoja vazhdimisht se duhet të gjeja një profesion tjetër dhe kështu, u regjistrova në një shkollë profesionale për teknik dentar. Një natë para fillimit të shkollës, kuptova se kjo kurrësesi nuk ishte rruga ime dhe vendosa të bëja shkollën profesinale të kuzhinës në Castelfranco, Treviso. Ky ishte momenti kur kuptova se doja të isha një shef kuzhine!”
Falë këtij vendimi, ja ku jemi sot, në zemër të ish-Bllokut në Tiranë, ku në rrugën “Ismail Qemali”, po bëhet gati të hapë dyert një prej restoranteve me shijen më unike që gryka e këtij kryeqyteti ka provuar.
“ ‘Attimi by Loris’ bazohet në takimin e kulturës italiane dhe asaj mbarë botërore. Ato ndërlidhen dhe frymëzojnë njëra-tjetrën pa u mbivendosur kurrë, gjë që i jep kuzhinës sonë një identitet të fortë krijues dhe e bën atë unike. Dua që pjatat që klientët provojnë në restorantin tim, t’u mbeten gjatë në kujtesë për shijen që vjen jo vetëm nga kombinimet e rafinuara, por edhe produketet e përzgjedhura me kujdes, të gjitha të certifikuara dhe me origjinë të kontrolluar.”-shprehet shefi Loris Marinetto, i cili zbulon gjithashtu se në restorantin e ri, do të sjellë më në fund dhe emblemën e kuzhinës japoneze: sushin.
“Kam udhëtuar dhe punuar në vende të shumta të botës, por kuzhina që ka ndikuar më shumë në formimin tim si shef është ajo japoneze dhe ajo e Amerikës së Jugut, prandaj në menunë e restorantit të ri kam vendosur të përfshij edhe sushin. Kjo pasi kuzhina japoneze dhe ajo e Amerikës së Jugut kanë qenë gjithnjë të lidhura me njëra-tjetrën. Madje ekziston dhe një kuzhinë specifike si frut i kësaj ndërthurjeje që quhet “Nikei”, që është dhe sfida ime e radhës. Kam shumë dëshirë ta sjell në Tiranë këtë kuzhine dhe në një të ardhme besoj se do ta realizoj.”
Kështu, teksa presim me padurim përurimin e restorantit që do të magjepsë Tiranën me shijet e tij, pyesim shef Loris pyetjen që çdokush dëshiron t’i bëjë një shefi kuzhine: “Cila është pjata që nuk duhet të largohemi pa e provuar?” Dhe përgjigja është e menjëhershme:
“Padyshim ëmbëlsira ‘Cappuccino a modo mio’!”
Një arsye më shumë, për të pritur me padurim përurimin e mbrëmjes së të mërkurës…
