Një nga shqetësimet që hasim të gjithë në plazhet shqiptare është se janë zaptuar nga privati. Ndërsa të gjitha vendet e botës janë pro idesë që të marrësh çadrën dhe ta vendosësh ku të duash ti, brenda një zone të caktuar, në shumë nga plazhet tona nuk të lejohet diçka e tillë.
Por tashmë në një rregullore të miratuar me një vendim të veçantë nga Këshilli i Ministrave parashikon që, subjektet që lidhin kontrata me njësitë e qeverisjes vendore për të marrë me qira një hapësirë në plazh për një afat nga 1 deri në 5 vite, duhet të respektojnë disa kritere.
Mes tyre përfshihet edhe lënia e hapësirave për pushuesit që duan plazh publik, si dhe mirëmbajta e bregut dhe pastrimi i tij.
Kështu për plazhet e tipit A, që janë plazhe kryesisht me përbërje ranore dhe gjerësi të konsiderueshme të brezit të plazhit, rregullorja parashikon që për çadrat dhe ndenjëset e pushuesve të respektohet një distancë prej të paktën 7.5 metra nga vija e bregut të detit, liqenit, lumit.
Po kështu hapësira prej 2.5 metra përpara brezit të parë të çadrave duhet të jetë e lirë për t’u shfrytëzuar nga publiku. Së treti hapësira midis çadrave (nga çadra në çadër) nuk duhet të jetë më e vogël se 3 metra në linjë horizontale me vijën e ujit, si dhe jo më e vogël se 2.5 metra në linjë vertikale me vijën e ujit.
Sesa do të zbatohet, kjo duhet parë!
Burimi: Monitor
