Një pikturë e shekullit të 18-të nga Galeritë Uffizi në Firence, Itali, u dëmtua sot nga një turist që ra mbi kanavacë ndërsa përpiqej të bënte një selfie, sipas burimeve të muzeut.
Piktura në fjalë është “Portreti i Ferdinando de’ Medici, Princit të Madh të Toskanës” (1722), nga Anton Domenico Gabbiani, një vepër nga ekspozita e përhershme në Palazzo Pitti aty pranë, por që tani ishte pjesë e ekspozitës së përkohshme “Firence dhe Evropa. Artet e shekullit të 17-të”, në Uffizi.
Sipas burimeve të galerisë, të cilat e përshkruan incidentin për mediat lokale, turisti u pengua ndërsa përpiqej të bënte një selfie dhe përfundoi i mbështetur në pikturë, duke e grisur kanavacën.
Imazhet e publikuara nga revista Finestre sull’Arte, në faqen e saj të internetit, tregojnë një çarje në pjesën e poshtme të pikturës, që arrin deri te imazhi i çizmes së kalërimit të Ferdinando de Medici-t.
Sipas galerive, dëmtimi është “i vogël” dhe portreti është hequr tashmë për riparime, me shpresën se do të kthehet në ekspozitë “brenda ditësh”.
