“Unë bëj gjëra të vogla, por me dashuri të madhe”. Një shprehje të tillë dashurie dhe mirësie nuk mund të buronte veçse nga shpirti i një dikujt që udhëhiqet prej këtyre virtyteve, si Nënë Tereza.
Ishte pikërisht viti 1979 kur bota nderoi një nga bamirëset më të shquara, atë që gjithë jetën e saj ja kushtoi një misioni fisnik; të jetë pranë atyre që kanë më shumë nevojë për dashuri; të varfërve dhe të përjashtuarve nga shoqëria.
Çmimi Nobel për Paqe, iu dha pikërisht për kontributin e saj në këtë kauzë globale. Një duartrokitje e ëmbël dhe e gjatë e priti Nënë Terezën, ndërsa u ngjit në podium.
“E kam prekur varfërinë kudo, jo vetëm në vendet e varfra, por kam gjetur varfërinë edhe në Perëndim, ku është shumë më e vështirë për t’u çrrënjosur; varfëria e shpirtit. Nëse një person lihet jashtë i padëshiruar dhe i vetmuar nga të tjerët, është një plagë po aq e madhe sa ajo që mos të kesh me ç’të ushqehesh”, deklaroi shenjtorja.
Ndërsa sot pas 37 vitesh, Papa Françesku u ngjit në Bazilikën e Shën Palit duke përcjellë mesazhe dhembshurie, në nder të shenjtërimit të Nënë Terezës. Si për të shuar çdo dyshim dhe diskutim për prejardhjen e saj, lutja e parë në meshën e shenjtërimit u mbajt në gjuhën shqipe.
“Sot po ju dorëzoj këtë figurë emblematike! Ajo qoftë modeli juaj i shenjtërimit! Ndoshta do të jetë e vështirë ta thërrasim Shën, por Shenjtëria e saj është kaq pranë nesh! Një Nënë që u bë Shenjt!”, u shpreh Ati i Shenjtë, duke vazhduar më tej: “Kudo qoftë një dorë që kërkon ndihmë, aty duhet të jetë prania jonë, dora e Kishës që mbështet dhe dhuron shpresë. Nënë Tereza ka qenë bujare, duke mundësuar pranimin për të gjithë dhe të mbrojtjes së jetës njerëzore. Ajo është përkul mbi persona që ishin braktisur nëpër rrugë duke u njohur dinjitetin që u ka dhënë Zoti”.
Veç buzëqeshjes dhe ndihmës së saj, shprehjet e Nënë Terezës janë një testament me shumë rëndësi për njerëzimin. 10 prej tyre ne po i kujtojmë në këtë ditë kaq të veçantë për të gjtihë botën.
10 shprehjet më të bukura:
1.Folu butësisht njerëzve! Tregoje mirësinë në fytyre, në sy, në buzëqeshjen tënde, në ngrohtësinë e buzëqeshjes tënde, gjithnjë të kesh buzëqeshje gazmore! Jep jo vetëm kujdesin, por edhe zemrën!
2.Ne s’mund të bëjmë dot gjëra të mëdha, vetëm gjëra të vogla me dashuri të madhe.
3.Nuk ka rëndësi sa shumë jemi të angazhuar të bëjmë, por sa shumë dashuri vendosim në të.
4.Shoh Zotin në çdo njeri. Kur laj një të sëmurë me lebër, ndjej se po kujdesem për Zotin. A nuk është kjo një eksperiencë e bukur?
5.Të varfrit na japin më shumë seç u japim ne atyre. Ata janë njerëz kaq të fortë, duke jetuar ditë për ditë pa ushqim. Dhe ata kurrë nuk mallkojnë, as nuk ankohen. Ne nuk duhet t’u japim atyre simpatinë, por duhet të mësojmë nga ata.
6.Kam zgjedhur varfërinë për njerëzit tanë të varfër. Por jam e nderuar të marr çmimin Nobel në emër të urisë, zhveshjes, të pastrehëve, të verbërve, të sëmurëve, të atyre njerëzve që janë të padëshiruar, që nuk i do njeri, nuk kujdesen për ta. Njerëzit që ndihen të braktisur nga shoqëria dhe të refuzuar nga të gjithë.
7.Nëse luksi na rrethon, ne humbim shpirtin. Ne do jemi të aftë të duam të varfrit nëse njohim varfërinë dhe jemi vetë të varfër.
8.Nuk kam qenë kurrë më parë në një luftë, por kam parë urinë dhe vdekjen. E kam pyetur veten se çfarë ndiejnë ata kur e bëjnë këtë? Nuk e kuptoj. Ata janë të gjithë bijtë e Zotit. Pse ata e bëjnë këtë? Nuk e kuptoj.
9.Zoti do të gjejë një person tjetër më fisnik, më të devotshëm, më të përkushtuar ndaj tij dhe shoqëria do të vazhdojë.
10.Po prisja të isha e lirë, por Zoti ka planet e tij.
Burimi: Telepace
