Bashkëshorti i ministres së Arsimit, Besa Shahini, është vënë në prangat e policisë së Kosovës.
Deputeti i Kosovës, Dardan Molliqaj është arrestuar në orët e hershme të mëngjesit, ka bërë me dije Partia Socialdemokrate e Kosovës.
Ai është vënë në pranga në shtëpinë e tij, pasi akuzohet për pjesëmarrje në protestën për lirimin e deputetit Albin Kurti në vitin 2015.
Sipas PSD-së deputeti nuk është paralajmëruar më herët për seancë apo paraqitje në gjykatë.
“Molliqaj është arrestuar nën arsyetimin për pjesëmarrje në protestën për lirimin e deputetit Albin Kurti, në vitin 2015. Arrestimi i deputetit në fjalë ka qenë në kundërshtim me liritë dhe të drejtat e njeriut dhe në shkelje të plotë të procedurave ligjore. Për këtë arsye, ajo protestë ka qenë e drejtë dhe e nevojshme”, thuhet në njoftimin e PSD-së në Facebook.
Partia Socialdemokrate ka kërkuar lirimin e menjëhershëm të deputetit, nën arsyetimin se Molliqaj nuk është vënë në dijeni se duhej të paraqitej në gjykatë.
“PSD është për shtet të së drejtës, ku respektohet liria për protestë dhe kritikë. Prandaj, për ne është e papranueshme çfarëdo përpjekje për cenimin e tyre”, thuhet në reagimin publik të partisë së tij.
Dardan Molliqaj ka vetëm një muaj që i ka dhënë fund beqarisë me ministren e Arsimit në Shqipëri, Besa Shahini. Ai publikoi foto nga dita më e rëndësishme, ajo e kurorëzimit të dashurisë me partneren më 3 prill të vitit 2019.
