Gjithçka ishte gati për ditën e madhe. Lokali i dasmës ishte prenotuar, Suela kishte porositur fustanet dhe kishte ngelur vetëm një muaj nga ceremonia.
Por një aksident në punë që pësoi Florenc Gjona në Greqi, shkatërroi të gjitha ëndrrat e çiftit. Florenci mbeti i paralizuar pasi u rrëzua nga kati i pestë i një ndërtese ku po punonte.
Në fillim, Suela e dinte që ai thjesht kishte lënduar këmbën, por kur shkoi në Greqi dhe e pa me sytë e saj, u trondit. Florenci e priti i ulur në karrocë dhe i shpjegoi gjithçka.
Ai i kërkoi ta linte dhe të vazhdonte jetën e saj:
“Unë e kam menduar disa herë. Duke e ditur që nuk jam i zoti për vete, mendoja çfarë do t’i afroja Suelës, sepse është shumë e vështirë, ndaj i kam kërkuar të largohet. S’ke pse të vuash me mua, por Suela nuk u dorëzua”, tregon Florenci mes lotësh në Top Magazine.
Por ajo nuk e bëri:
“E thoshte largohu, por nuk e ndiente. Në atë moment, ai mendonte se asgjë nuk vazhdonte, se jeta vazhdonte, ndaj mua mu desh t’i thosha që gjërat vazhdojnë, që jeta vazhdon, që ka edhe më keq se kjo gjendje, që ishte shumë mirë”, tregon Suela.
6 muaj në spital, ai në shtrat, ajo në një shezlong të marrë me qira, çifti nga Elbasani, përjetuan momente të vështira. Në fillim, Suela donte që Florenci të dilte nga ajo gjendje, por dinte gjithashtu se nuk mund të jetonte pa të, në çfarëdolloj situate. Nuk e bëri për meritat e një heroine, por sepse ashtu ia donte zemra.
Sot pas 9 vitesh, Florenc dhe Suela Gjona, nuk i kanë humbur shpresat tek dashuria e tyre. Ata jetojnë në kushte të vështira, me 40 mijë lekë rrogë mujore, por të lumtur.
