Kur mendojmë një propozim përfytyrojmë atë tradicionalin: mashkulli gjen vendin dhe momentin e duhur për t’i kërkuar asaj që të lidhen. Por me pedagogen e degës së “Gazetarisë” ka ndodhur e kundërta. Iris Luarasi, pasditen e djeshme në emisionin “Rudina” rrëfeu më shumë për jetën private, për marrëdhënien e saj të gjatë me bashkëshortin, Eno, dashuria për të cilin i lindi kur ata punonin bashkë në Radio Tirana.
Irisi rrëfeu se ka qenë ajo e para që ka ndërmarrë hapin e madh:
“Unë e kisha shumë të qartë që ai e kishte shumë të rëndësishme pjesën e miqësisë dhe shoqërisë. Ai mendonte se kur njerëzit janë miq të mirë dhe shok të mirë, po e bëre këtë hapin dhe në qoftë se kjo nuk funksionon, ti nuk kthehesh dot te miqësia e mirë”.
“Unë dhe bashkëshorti im kemi qenë shokë për shumë vjet, bënim emisionet bashkë dhe pastaj gjërat erdhën dalëngadalë. Duke punuar, erdhi dhe dashuria mes nesh. Dhe kam qenë unë që kam ndërmarrë hapin e parë. Ndërsa unë kam qenë natyrë më pragmatiste dhe më fleksibël. Dhe mendova se pse të mos e ndërmerrja unë hapin e parë kur unë e doja shumë. Dhe funksionoi. Ne të dy kemi 14 vite bashkë, por jemi njohur 10 vite para se të martoheshim dhe më duket sikur kam gjithë jetën me Enon. Eno ka hapur radion e parë në Tiranë “Radio ime” dhe merret ende me të. Unë pa mbështetjen e Enos nuk do të isha këtu ku jam”, tha Luarasi.
