Dorëheqja e ministres së Arsimit, Besa Shahini, nuk ishte aspak një surprizë! E papritur ishte koha që zgjodhi të përcjellë lajmin, pikërisht dita e parë e shkollës, kur mijëra nxënës morën sot guximin dhe u ulën për herë të parë në bankat e shkollës mes frikës nga pandemia që ka gjunjëzuar gjithë botën.
Shahini kishte paralajmëruar ditë më parë për largimin e saj, madje bëhej fjalë për një largim më të madh sesa vetëm nga qeveria. Ajo shprehej qartë se nuk do të vazhdojë të qëndrojë në Shqipëri pas këtij mandati, por në Kosovë, aty ku kishte familjen e saj.
Pra, një ministre e cila duhet të përgatisë dhe të drejtojë sot brezat e së ardhmes, nuk e shikonte fare të ardhmen e saj në vendin tonë.
“Unë tashmë kam njoftuar dhe kryeministrin Rama dhe kam marrë një vendim se nuk do të vazhdoj të qëndroj në Shqipëri përtej këtij mandati. Jeta ime është e paqëndrueshme në Shqipëri pasi familja ime jeton në Kosovë. Në këto momente kur ka probleme nga këto siç jemi ballafaquar është pak e vështirë. Por, i kam thënë se jam në dispozicion që të shërbej, por nuk do të përfshihem në fushatë elektorale”, shprehej ditë më parë ministrja e Arsimit.
Për fat të keq, sot as nuk dimë të themi çfarë bëri Besa për arsimin më shumë sesa bëri Lindita Nikolla, apo Genc Pollo. Por dimë të themi se Besa kishte në dorë të bënte gjëra të mëdha në kushte shumë më ndryshe nga dy kolegët e saj të mëparshëm, atë të pandemisë, që ndodh një herë në 100 vjet.
Së pari, Besa Shahini mund t’i jepte jetë projektit të shkollave dixhitale, të lënë në harresë nga qeveria, që sot më shumë se kurrë ishte i nevojshëm në kushte pandemie. Nxënësit, mësuesit apo prindërit janë ushqyer prej vitesh me idenë e shkollave dixhitale dhe kur erdhi koha e duhur për t’i përdorur ato gjatë pandemisë, mësimi online dështoi.
Së dyti, Besa mund të inicionte rritjen e pagave të mësuesve, duke qenë se i dërgoi të gjithë në shkollë për t’u përballur me rrezikun e virusit Covid-19, dhe jo duke u bazuar në studime e analiza të mirëfillta të situatës në Shqipëri, por në një sondazh online.
Pak ditë më parë, Rama paralajmëroi krah Shahinit për rritjen e pagave të mësueve vitin që vjen. E thënë në prag zgjedhjesh, ky vendim duket sikur do bjerë sërish në vesh të shurdhër, ashtu si çdo premtim fushate me të cilën as Besa nuk donte të merrej fare këtë vit!
Së treti, Besa Shahini mund të ulte edhe faturën vjetore të shkollave apo universiteteve për ata nxënës dhe studentë që për shkak të tërmetit dhe më pas pandemisë, nuk i kanë frekuentuar në mënyrë të rregullt auditoret në vitin akademik 2019-2020.
Së katërti, Shahini mund të bënte diçka për mungesën e investimeve në shkollat e zonave rurale, por edhe kur u përball me këtë kritikë, ajo tha se qeveria nuk mund të tregohet e papërgjegjshme dhe të shpenzojë para, për shkolla që kanë shumë pak nxënës dhe që në të ardhmen, mund të mbeten të boshatisura.
Arsimi në Shqipëri ka kaq shumë mangësi që shtohen nga viti në vit, saqë Besa Shahini kishte mundësi të bënte një ndryshim, që tani që iku dhe zgjodhi familjen e saj, të paktën mund të thoshim se bëri diçka për një familje akoma më të madhe, atë të arsimit në Shqipëri.
/Iconstyle.al
