Klodjana Lala ka qenë e ftuar në emisionin “Opinion” ku dhe ka treguar detaje të reja lidhur me vrasjen e Eglantina Bucit të ndodhur në vitin 2012 në Malin me Gropa.
Sipas Lalës, 23-vjeçarja ishte larguar nga shtëpia pasi familja do ta martonte me një djalë me emrin Lorenc.
“Ata donin që ta martonin me një djalë nga Fushë Kruja me një djalë me emrin Lorenc. Jeton sot në Itali, ka një familje dhe bën jetë të mirë.”
Më tej Lala tha se i ati e përndiqte të bijën gjithë kohës, madje ishte zënë me një këngëtar tallavaje, që i kishte kërkuar vajzës ta kishte në videoklip.
“Vajza kishte tentuar të ishte pjesë e një videoklipi të një këngëtari tallava dhe babai ishte përballur dhe konfliktuar me këngëtarin duke mos e lejuar. Babai ishte obsesiv ndaj vajzës. I vetmi njeri me të cilin mbante kontakte vajza ishte xhaxhai”.
Gazetarja Lala tha se nëna e Eglantina Bucit nuk e ka takuar kurrë të bijën dhe as tre fëmijët e tjerë dhe nuk është lejuar të shkojë as në funeralin e djalit që vdiq në vitin 2014 pas një sëmundjeje.
“Nëna nuk është lejuar të shkojë në varrimin e të birit dhe e ka mësuar shumë vonë varrin e tij nga një grua e zonës”, tha gazetarja.
Gjithashtu Lala tha se gjatë marrjes në pyetje, Shkëlzen Buci, vëllai i viktimës ka mohuar kategorikisht krimin.Ndërsa bashkëpunëtori i drejtësisë është marrë në mbrojtje dhe familja e tij është dërguar jashtë shtetit.
“Vëllai ka thënë nëse shteti shqiptar e vërteton vrasjen e motrës time, le të më vrasin në mes të Tiranës. Familja e dëshmitarit është larguar nga vendi dhe atij i është ndërruar identiteti. Pas gjyqit do të largohet dhe do të ketë identitet tjetër,”-tha Lala.
/gazetareforma
