Sa më shumë kalon kohë, aq më tepër pandemia merr trajtat e një krize ekonomike, teksa sektori që e ka pësuar më së shumti nga pandemia duket të jetë turizmi që po kalon periudhën më të vështirë të mundshme.
Të gjithë jemi dëshmitarë se si qeveria nuk bëri pothuajse asgjë për këtë sektor duke e lënë në harresë totale, në një kohë që të gjitha vendet europiane dhe jo vetëm, po mendojnë sesi të ringrejnë turizmin pas pandemisë me rimbursime të pagesës së pushimeve apo me bonuse e promocione që i shtyjnë popujt t’i bëjnë pushimet në vendet e tyre!
Shembulli i fundit vjen nga Italia, e cila përtej gjithë shkatërrimit që pësoi nga pandemia, po përgatit një paketë të re për të mbështetur ekonominë, e cila do të jetë e fokusuar tek turizmi dhe nxitja e konsumit. Zëvendës ministrja e ekonomisë italiane, Laura Castelli, foli për një paketë të re të masave për bare dhe restorante, duke filluar nga zgjatja e përjashtimit për të mbajtur tavolinat tek një fond garancie për qiratë e aktiviteteve që janë akoma në krizë deri në prezantimin e një “stimulimi të konsumatorit”. Ndërkohë që parashikohet të zgjatet bonusi prej 600 eurosh për punëtorët sezonalë të turizmit.
Fatkeqësisht, ndonëse potencialet natyrore i kemi, qeveria shqiptare duket shumë larg vendimeve të vendit fqinj. Dhe mirë që nuk ofron ndihmë për sektorin që mban gjallë ekonominë e vendit tonë, por i jep edhe një shuplakë më të fortë nëpërmjet gjobave, e aq më keq nëpërmjet aksionit të shembjeve që nisën në fillim të sezonit turistik e vijojnë ende edhe në pikun e tij.
Që prej 10 qershorit, kur shembi 27 objekte në plazhin e Velipojës në Shkodër, Inspektoriati Kombëtar i Mbrojtjes së Territorit e ka shtrirë aksionin edhe në zona të tjera bregdetare të vendit. Shembja është bërë pa njoftim dhe vënien në dijeni të pronarëve apo përdoruesve, duke vepruar forcërisht, në shkelje të parimeve themelore kushtetuese të drejtave të njeriut. Në këto veprime inspektorët e IKMT janë shoqëruar nga efektivë të Policisë së Shtetit dhe dhunshëm kanë prishur këto struktura, duke cënuar integritetin njerëzor dhe qytetar, gjë e cila bie ndesh katërcipërisht me dispozitat ligjore të parashikuara.
Së fundmi, Drejtoria e Përgjithshme e Tatimeve njofton se ka nisur zbatimin e planit të masave për Sezonin Turistik 2020. Ky plan synon informimin dhe ndërgjegjësimin e tatimpaguesve që ushtrojnë aktivitet në zonat turistike, në mbarë vendin, në sektorin e veprimtarive të turizmit (bar, restorant, hoteleri etj.) për zbatimin me korrektësi të legjislacionit tatimor, si dhe rritjen nivelit të vetëdeklarimit dhe pagesës së detyrimeve tatimore.
E padyshim si gjithmonë të goditurit në këtë situatë janë ‘të vegjlit’ sepse Policia rri duarkryq kundrejt shkeljeve që bëjnë të mëdhenjtë. Në media qarkullojnë foto e video të ndryshme që dëshmojnë se resortet prestigjioze vijojnë të grumbullojnë njerëz dhe të mbajnë muzikën ndezur edhe pas orës 20:00 duke shkuar në kundërshti totale me ligjin, por askush nuk gjobitet.
Edhe në redaksinë e “iconstyel.al” kanë ardhur me dhjetëra denoncime se disa nga clubet më prestigjioze vijojnë aktivitetin e tyre si më parë pa u shqetësuar për asgjë.
Në këto kushte ndërhyrjet e shtetit mbeten të pashpjegueshme, me selektimin e famshëm “një i nënës dhe një i njerkës”, duke mos e zbatuar ligjin me të gjithë. Ky sektor duket se do vijojë të jetë gjatë një pacient i intubuar jo për shkak të Covid-19, por për shkak të ‘mjekëve’ të cilët supozohet të kujdeseshin për të.
