Kur vjen puna tek pushimet, është e pashmangshme të mos përfshihesh në vorbullën e pafundme e kaotike të paketave turistike të reklamuara nga agjencitë turistike në përpjekje për të vendosur një destinacion që të përshtatet. Dhe teksa afrohemi në zonën më të nxehtë përsa i përket jo vetëm temperaturave, por edhe kulmit të sezonit turistik, muajit gusht, “iconstyle.al” ka vendosur t’jua bëjë zgjedhjen super të thjeshtë, duke ju sugjeruar 5 destinacione fantastike të cilat gjithësecili prej nesh duhet të vizitojë të paktën një herë në jetë për eksperienca pushimesh që nuk do t’i harroni gjithë jetën.
Santorini
Keni thënë ndonjëherë “Duket të shkoj një herë në Santorini” pasi keni parë pamjet prej kartoline të ishullit të famshëm grek? Epo kjo verë është e duhura! Përfytyrojeni veten të përhumbur mes rrugicave piktoreske apo në ndonjë prej vilave me pishina spektakolare në ishullin që ofron perëndimin më magjik në botë. Qoftë për t’u larë në ujrat e kristalta të detit Egje, për të provuar verën e famshme nga disa prej vreshtave më të vjetër në botë apo për të shijuar peisazhin magjepsës, Santorini është gjithnjë një destinacion i duhur, i konsideruar si më i veçanti ndër të gjithë ishujt grekë. Dhe një sekret i vogël… Santorini është parajsa e të apasionuarve pas shopping-ut.
“Mendoj se e kam rritur pak Produktin e Brendshëm Bruto teksa vizitoja dyqanet në Snatorini…”-ka deklaruar aktorja me famë botërore Catherine Zeta-Jones pas udhëtimit të saj të parë në ishull. E kush mund t’i vërë faj?!
Lisbona
Nëse ke sadopak pasion për kulturën, arkitekturën, e ushqimin e mirë, atëherë Lisbona, është vendi i duhur për ty këtë verë. Kryeqyteti portugez është thjesht unik! Në një kombinim perfekt mes të vjetrës e të resë, qetësisë e gjallërisë, Lisbona është një qytet që ka për t’i ofruar gjithçka vizitorëve të saj. Mund të eksplorosh një librari të 1700-ës e të shijosh një drekë të shijshme mesdhetare në një restorant super modern vetëm pak hapa më tej. Lisbona me historinë e saj të pasur, shquhet për arkitekturën e infastrukturën që është e pamundur të mos surprizojë këdo që e sheh për herë të parë.
Dhe nëse vërtet vera për ju nuk ka kuptim pa pakëz plazh, atëherë keni qëlluar në shenjë sepse kryeqyteti portugez numëron me dhjetëra plazhe fantastike për një eksperiencë pushimesh që përfshin gjithçka që dikush mund të kërkojë.
Mikonos
Nëse kohët e fundit në rrjetet sociale keni parë gjithnjë e më shumë video mbresëlënëse nga Mikonos e veçanërisht nga personazhe të famshëm shqiptarë e të huaj, ka një arsye: Është parajsë! Jo vetëm për plazhet mbresëlënëse, por edhe për akomodimet super luksoze si në resortet e famshme në të gjithë botën, ashtu edhe në vilat private që të ofrojnë intimitet të plotë. Mikonos është kudo në listat e destinacioneve më ekskluzive të pushimeve dhe s’kishte si të ishte ndryshe, për sa kohë përzgjidhet thuajse çdo vit nga yje si Leonardo DiCaprio, Kendall Jenner e Bella Hadid .
Pas një dite relaksuese në plazh, mund të shëtisni në qytezat magjepsëse me ndërtesat tipike të bardha ku çdo vizitë është një surprizë më vete falë restoranteve spektakolarë, bukurive arkitekturore dhe sigurisht, butikëve të disa prej brand-eve më të njohura ndërkombëtare. Një bonus për këdo që i ka qejf festat: Jetë nate si ajo në Mikonos vështirë të gjesh në vend tjetër!
Sardenja
Nëse plazhet magjepsëse të smeraldta dhe rëra rozë me famë botërore nuk janë mjaftueshëm për t’ju bindur se Sardenja është një parajsë mbi tokë, atëherë bëhuni gati sepse ka edhe më. Në Sardenjë gjenden disa prej resorteve më luksoze dhe më ekskluzive të të gjithë Mesdheut që ofrojnë dhe krahas relaksit total dhe një jetë nate tërësisht të çmendur. Natyra mbresëlënëse që në shumë pjesë të ishullit është ende e virgjër është një nga atraksionet më të rëndësishme të destinacionit që vizitohet gjerësisht nga personazhe VIP të njohur ndërkombëtarisht.
Falë traditave unike, festivaleve tradicionale, kuzhinës së pashoqe e bukurisë së pafundme natyrore, Sardenja është e ndryshme nga çdo pjesë tjetër e Italisë që mund të keni parë deri më tani, çka e bën një “must-see” për këdo të apasionuar pas udhëtimit.
Napoli
“La dolce vita” është një nga shprehjet më të gjetura për t’u asociuar më mënyrën e jetesës all’ italiana dhe më mirë se në Napoli, vështirë se mund ta provoni diku tjetër. Një qytet që të zgjon të gjitha shqisat që në hapat e parë, dhe që e bën thuajse të pamundur të mos dashurohesh me kaosin aq argëtues që e karakterizon. Me një histori të pasur sa për 5-6 shtete bashkë, Napoli është destinacioni perfekt për adhuruesit e historisë e arteve të bukura, duke qenë se muzeu Capodimonte është i dyti në Itali me më shumë thesare të artit duke numëruar kryevepra të Michelangelo-s, Botticelli-t e madje edhe të Andy Warhol.
Vetëm se kushdo që viziton Napolin, duhet të dijë rregullin e artë: Në këtë qytet fjala “dietë” është thuajse një blasfemi! Dhe kjo është e kuptueshme duke qenë se bëhet fjalë për vendin origjinë të pizza-ve. Në Napoli do të bëni be se keni provuar pizza-n më të mirë të jetës suaj dhe kushdo e ka të pamundur të mos joshet nga ëmbëlsirat tipike kremoze apo pastat e gatuara në tratoritë që ruajnë me fanatizëm traditat kulinare të gjysheve duararta italiane. Kështu, pasi t’i kesh rënë kryq e tërthor rrugicave napoletane, s’duhet të largoheni pa bërë edhe një vizitë në perlat e tjera që ndodhen fare pranë: Amalfi, Positano dhe në Capri-n magjik.
