Një autobus urban elektrik për herë të parë testohet në linjën Kombinat-Kinostudio, për të parë mundësinë e aplikimit të këtij mjeti në transportin e kryeqytetit.
Sot nisi pikërisht ky testim me autobusin e parë elektrik. Kryebashkiaku Erion Veliaj deklaroi se Tirana ndodhet në avangardë të zhvillimit dhe se përmes transportit të ri elektrik, do të renditet mes kryeqyteteve të para në Europë që ndërmarrin këtë nismë:
“Ajo që po ndodh sot në Tiranë është ajo që po ndodhte dje edhe në Paris, ku zyrtarët e Bashkisë po testonin dy autobusë si po performonin në linjat e Parisit. Tirana është avangarde. Më vjen mirë që ne jemi në këtë fashë të parë të qyteteve që po shkojnë drejt këtij zhvillimi”.
Nëse ishit kuriozë të shikonit se si është një autobus i tillë, ai ka pamjen e ngjashme me ato që keni parë deri më sot. Ndryshimi është se nuk do të ndotin ajrin, pasi do të lëvizin vetëm përmes karikimit.
Veliaj tha se ka nisur puna për instalimin e pikave të karikimit të automjeteve elektrikë.
Kreu i Bashkisë publikoi një foto në rrjetet sociale me mbishkrimin: “Një foto me autobusin e parë elektrik”.
