Fakti se ende nuk ka një film për jetën e Britney Spears është akoma suprizuese, por mos u shqetësoni sepse diçka e tillë është rrugës. Duket se tashmë është vendosur që të hyhet në jetën magjepsëse të yllit të muzikës pop, sipas “The Hollywood Reporter”.
Kanali amerikan, Lifetime Channel, i njohur për filma të ndryshëm biografi që u ka realizuar artistëve ndër vite, tashmë i ka kthyer sytë nga ish-Princesha e Popit.
Për bukuroshen 34-vjeçare do të realizohet një film dy orësh, ku do të rrëfehet karriera që nga hapat e parë, suksesi i shpejtë, rënia dhe rikthimi triumfator. Udhëtimi do të nisë me fëmijërinë e Spears në Louisiana, ndërsa do të shohim sfidat e saj personale përgjatë viteve, marrëdhënien me Justin Timberlake, Jason Alexander dhe Kevin Federline, ndarjet e bujshme dhe humbjen e betejës për kujdestarinë e fëmijëve.
Puna ka filluar që tani, me aktoren australiane Natasha Bassett që është përzgjedhur për të portretizuar Britneyn. Pikë kulmore e filmit do të jenë padyshim dhe lidhjet e saj të famshme me Justin Timberlake dhe Kevin Federline. Për premierën do na duhet të presim pak, pasi del në vitin 2017.
Burimi: Moviefone
