A nuk mbrohen fëmijët ligjërisht në luftëra?
Po, kështu është përcaktuar! Rregullat e pranuara ndërkombëtarisht të konfliktit të armatosur u miratuan sipas Konventave të Gjenevës në vitin 1949, sipas të cilave fëmijët duhet të mbrohen dhe të trajtohen në mënyrë njerëzore.
Izraeli i ratifikoi konventat në vitin 1951, vetëm pak vite pasi një milion e gjysmë fëmijë hebrenj u vranë në Evropë gjatë Holokaustit. Por Izraeli nuk e njeh Konventën e 4-të të Gjenevës, e cila mbron civilët që luftojnë një okupim, pasi nuk e konsideron Palestinën si tokë të pushtuar.
Përdorimi joproporcional i fuqisë ushtarake në Gaza po cilësohet nga Izraeli si një mjet legjitim për të shkatërruar Hamasin. Dhe kështu vdekjet e civilëve të numëruara në sulme, duke përfshirë fëmijë, nuk kualifikohen si krime lufte, siç pretendon Izraeli.
Një nënë 30-vjeçare tregoi për Al Jazeera se fëmijët e saj, tetë dhe dy vjeç, kanë filluar të kenë të vjella pas sulmeve ajrore dhe gjithashtu po urinojnë në shtrat, si përgjigje ndaj frikës së shtuar.
Një studim i psikologut Iman Farajallah, zbuloi se fëmijët që u mbijetojnë luftërave nuk dalin të padëmtuar dhe mund të paguajnë një çmim të lartë psikologjikisht, emocionalisht dhe në mënyrën e sjelljes. Shumë prej tyre shfaqin shqetësim, regres ose sjellje të dhunshme.
Një nënë 35-vjeçare tregoi për Al Jazeera se djali i saj 13 vjeç, është shumë i nervozuar dhe sulmon këdo. Ai kërcen nga frika me çdo tingull dhe nuk mund të durojë që dikush të flasë me zë të lartë, edhe nëse bën shaka.
Për ata që nuk vdesin në këtë luftë, duhet të mësojnë se si të mbijetojnë pa pjesën tjetër të anëtarëve të familjes së tyre, thotë kirurgu Ghassan Abu-Sitta, që e ka quajtur këtë një “luftë kundër fëmijëve”.
Orët e fundit në Gaza kanë qarkulluar foto të fëmijëve që në pëllëmbë të dorës shkruajnë emrin, mbiemrin dhe numrin e identitetit kombëtar, në rast se familja do të duhet t’i identifikojë, nëse edhe ata vdesin.
Gaza është e privuar nga uji i pijshëm, energjia elektrike dhe ushqimi. Banorët përdorin ujërat e zeza nga puset, duke rritur rrezikun e sëmundjeve dhe infeksionet, sidomos për fëmijët, që përbëjnë gati gjysmën e popullsisë së tyre.
Në historinë konfliktuese mes Izraelit dhe Hamasit, nuk ka patur çast më të përgjakshëm se ky për jetët e fëmijëve, ndërsa shifrat janë të padëgjuara më parë!
Kamionët që transportojnë ndihma humanitare do të hyjnë në Gaza nga gadishulli Sinai i Egjiptit në ditët në vijim, sipas Shtëpisë së Bardhë, pas vizitës së Joe Biden në Izrael të mërkurën. Biden tha se Izraeli kishte rënë dakord të lejonte hapjen e kalimit, me kusht që ndihmat humanitare (ushqime, ujë dhe furnizime mjekësore) të mos përdoren nga Hamasi.
Të paktën 21 gazetarë janë vrarë nga të dyja palët që nga shpërthimi i luftës Hamas-Izrael, sipas Komitetit për Mbrojtjen e Gazetarëve.
Tragjedia vazhdon… 💔
