Pandemia e koronavirusit ka ndryshuar në mënyrë drastike mënyrën e jetesës në qytetet më të prekura në Shqipëri dhe efektet ndihen edhe pas lehtësimit të masave të izolimit.
Veçanërisht në Tiranë, ku qarkullimi me automjete u kufizua si kurrë më parë duke zbrazur rrugët e kryeqytetit nga automjetet. Kështu, teksa shqiptarët filluan të shijonin ajrin e pastër që kishte braktisur Tiranën prej vitesh, kryetari i Bashkisë Erion Veliaj iu rikthye nisëms për shtimin e korsive të biçikletave në qytet.
Drejtuesit e automjeteve nuk janë ekzaktësisht entuziastë për këtë nismë duke qenë se ngushton së tepërmi rrugët automobilistike çka mund të rezultojë në trafik të shtuar e po ashtu, pakënaqësi ka dhe nga bizneset që operojnë buzë rrugëve kryesore të cilët privohen nga një pjesë jo e vogël e klientelës vetëm se këta të fundit nuk kanë më hapësira parkimi (lexo këtu).
Megjithatë, një biznes në veçanti duket se po lulëzon në këtë periudhë. Bëhet fjalë për dyqanet e biçikletave, të cilët që prej fillimit të pandemisë, kur u bllokua transporti publik dhe u kufizua lëvizja e makinave, kanë parë një boom shitjesh.
“Ndikim të madh ka pasur pandemia, por edhe shtimi i korsive ka ndikuar shumë”- shprehet për “iconstyle.al” një përfaqësues i “Biçikleta Tirana Pedal”.
Të njëjtën gjë na pohojnë dhe nga faqja për shitjen e biçikletave të quajtur “Biçikleta e Glenit”: “Shtimi i korsive të biçikletave ka pasur ndikim pozitiv tek çdo person që përdor dyrrotakun në qytet, siguisht dhe tek mua! Përgjatë javëve të fundit ka patur realisht një interesim më të madh për biçikletat.”
Por teksa pritej që shtimi i popullaritetit të biçikletave të sillte një pakësim të makinave në rrugët e Tiranës, në realitet gjërat vijojnë të jenë njëlloj si më parë, për të mos thënë më keq për shkak të ngushtimit të rrugëve automobilistike.
Trafiku automobilistik vijon të jetë po i njëjti në kryeqytet, çka të bën të mendosh se përdorimi i dyrrotakëve mund të ketë qenë thjesht një trend momental i pandemisë, derisa njerëzit të mund t’i riktheheshin sërish makinave. Ndaj dhe ëndrrat për një Tiranë me ajër të pastër sikurse shpresonim gjatë karantinës, duken ende të largëta.
