Ka nisur sot mësimi në shkolla i të gjithë atyre fëmijëve që nuk kanë pasur akses në mësimin online.
Bëhet fjalë për 4500 fëmijë, që janë kryesisht nga komuniteti rom, egjiptjanë dhe ato të shtresave në nevojë që nuk kanë pasur mundësi për të ndjekur mësimin online.
Rreth 2600 mësues janë vendosur në dispozicion të tyre, për të fituar njohuritë e humbura që duhej t’i merrnin gjatë karantinës.
“Bëjmë me dije se në datën 31 gusht deri në 11 shtator do të zhvillohen mësime plotësuese VETËM me ata nxënës të klasave 1-5 (cikli fillor), të cilët nuk kanë pasur akses dhe mundësi gjatë periudhës së mësimit online, mars–maj 2020. Ky program plotësues i pajis këta nxënës me njohuritë dhe aftësitë gjuhësore dhe matematikore që i përkasin programit mësimor, të zhvilluar në periudhën mars-maj 2020”, njoftoi më herët Ministria e Arsimit.
Mësimi online rezultoi të jetë një dështim i Ministrisë së Arsimit. Pavarësisht se nxënësit, e mësuesit janë ushqyer prej vitesh me idenë e shkollave dixhitale, kur erdhi koha e duhur për t’i përdorur ato në pandemdi, mësimi online dështoi.
Me hapjen e shkollave, rekomandohet të ndiqet protokolli bazë për pandeminë. Nxënësit duhet të jenë të pajisur me maska dhe të ruhet distanca sociale. Kjo masë duket të jetë e thjeshtë në zbatim tani që ka një numër të pakët të nxënësve, të cilët do jenë të ndarë në 600 klasa.
Ndërkohë, viti i ri shkollor 2020-2021 që do të nisë me 14 shtator, pritet të sjellë sfida të reja me rikthimin në shkollë të të gjithë nxënësve, të cilët mund të rrezikojnë jetën e tyre, të prindërve apo të mësuesve me një papërgjegjshmëri të vogël.
/Iconstyle.al
