Sa më e madhe të jetë audienca e një televizioni, aq më i madh përfitimi nga reklamat.
“Monitor” ka publikuar disa të dhëna në lidhje me shumën e parave që fiton secili nga televizionet shqiptare për 1 sekondë reklamë.
Kështu “Top Channel” për vite me radhë mbërthen pjesën më të madhe të audiencës së të dielës. Një sekondë transmetim kushton 8400 lekë, ose rreth 66 euro (tarifa e sezonit të kaluar) dhe programi më i shtrenjtë për të reklamuar është shfaqja e humorit “Portokalli”, që transmetohet të dielën.
Tarifa të ngjashme ka vendosur “Vizion Plus” për show-n televiziv “Dancing with the Stars” për sezonin e kaluar (7,700 lekë).
Emisioni politik më i shtrenjtë është ai i televizionit “Klan”, “Opinion”, ku një sekondë kushton 50 euro (rreth 6,300 lekë me kursin aktual).
Në emisionin e Vizion Plus, “Top Story”, nga Sokol Balla, që konkurron në të njëjtin orar të enjten, një sekondë reklamë kushton, sipas tarifave zyrtare 6 mijë lekë.
Më i lirë të enjten ka qenë programi politik i “Top Channel”. Në sezonin e kaluar, si tek “Top Story” ashtu dhe tek të “Pa Ekspozuarit”, një sekondë reklamë kushtonte 2,700 lekë.
Pagesat për reklama në emisionet e argëtimit
Për “Zonë e Lirë”, të Arian Çanit dhe “Dance with Me”, të drejtuar nga Alketa Vejsiu, tarifat janë 40 euro për 1 sekondë .
Po 40 euro kushton një sekondë reklamë edhe për emisionet e reja “Duplex” dhe “Familja”.
Përgjysmim të tarifave ka emisioni “Xing me Ermalin”, nga 50 në 25 euro për sekondë.
E diela pasdite është e Ardit Gjebreas, me “E diela Shqiptare”, ku një sekondë reklamë varion nga 35-40 euro, e pandryshuar nga një vit më parë.
Në Vizion Plus, një sekondë në emisionin humoristik të së shtunës në “Al Pazar”, drejtuar nga Agron Llakaj, kushton 6,600 lekë, duke qenë më i shtrenjti në këtë televizion.
Teksa pritet të fillojë “Big Brother celebrity”, “Top Channel” në sezonet e kaluara të “Big Brother”, kishte tarifa prej 8,400 lekë për sekondë, njësoj me “Portokalli”.
Burimi: Monitor
