Ajo e nisi karrierën e modelingut në Shqipëri, duke rënë në sy të fotografit Sonny K. Elson, për tiparet e veçanta që ka. Por sot, Arselajda Buraku është cilësuar si një ndër modelet e momentit nga revista prestigjioze, “Paper”.
Në një intervistë për revistën, Arselajda tregon se u nis me një valixhe të vetme nga Tirana në New York dhe takoi një nga përfaqësuesit e agjencisë amerikane të modelingut, Muse, ku dhe bën pjesë.
“Unë kam qenë gjithmonë në kërkim të lirisë, e dua trupin tim dhe i shpreh ndjenjat e mia. Modelimi është një mënyrë e përsosur për ta bërë këtë. Kam ardhur nga Shqipëria në NYC me një valixhe. Takova Muse dhe fola me ta në lidhje me udhëtimin tim. Ata e donin energjinë time dhe menduan se kisha një paraqitje të mirë dhe kështu filloi gjithçka”, thotë Arselajda.
E pyetur për vendlindjen e saj, Arseljada thotë, “vendi ka një histori kaq të gjatë, të pasur dhe njerëzit janë të sjellshëm dhe frymëzues. Jo shumë njerëz e dinë se Shqipëria ka gjuhën e vet të veçantë të quajtur Shqip. Kjo është një gjuhë e bukur me romancë, patos dhe krenari”.
