Pas orës 02:30 nuk kishte mbetur asnjë shenjë nga çadra në bulevard, me përfundimin e një prej protestave më të gjata në historinë e politikës shqiptare. Prej 90 ditësh bulevardi “Dëshmorët e Kombit” u kthye në kryeqendrën e demokratëve nga e gjithë Shqipëria.
Çmontimi nisi pas orës 22:00, kur kreu i Partisë Demokratike, Lulzim Basha u rikthye për herë të fundit në atë që e kishte pagëzuar si “çadra e lirisë”. E deklaroi atë të mbyllur, e konsideroi fitore dhe doli i shoqëruar me brohoritjet e simpazantëve, që e shoqëruan deri në selinë e PD-së.
Të parët që u larguan ishin stolat, kondicionerët, flamuri, “led wall”-et dhe gjithçka tjetër që strehoi për tre muaj në brendësi të saj protestuesit e PD-së.
Ndërmarrjet e Bashkisë së Tiranës nisën punën për pastrimin, menjëherë pas çmontimit të çadrës. Automjetet e pastrimit kanë hequr materiale të tilla si shkopinj, qese, letra, shishe uji, etj, duke e rikthyer bulevardin në normalitet pas 4 muajsh.
