Nga sot një hapësirë e re në kryeqytet është gati për të mirëpritur qytetarët dhe e kemi fjalën për Kalanë e vjetër të Tiranës.
Në një mjedis argëtimi prej 1800 metrash katrorë janë të vendosur suveniresh, që promovojnë trashëgiminë kulturore, mozaikë e restorante tradicionale.
“Kalaja e Tiranës do të shërbejë si një mjedis bashkëjetese midis të vjetrës dhe të resë, mjedis kulinarie, artizanati, orientim shijesh, arti, mode”, u njoftua pak javë më parë në zyrtare të kësaj hapësire në Instagram.
Kryebashkiaku Erion Veliaj i shoqëruar nga ministrja e Kulturës, Mirela Kumbaro, vizitoi mjediset e rehabilituara të Kalasë.
“Jam i bindur se kjo do të jetë një histori suksesi, jo vetëm për të gjithë ne që jemi në Tiranë, dhe që do ta shijojmë, por për shumë turistë. Jam i sigurt se do të kthehet në një destinacion, do të jetë ndoshta një nga vendet më të vizituara”, deklaroi Veliaj.
Ky ambient është ndërtuar si një risi mes të vjetrës dhe të të resë, për të promovuar vlerat, traditën, artin, arkivat e ndryshme, kostumografinë, folklorin, vallen, veglat muzikore, kurset e ndryshme deri te tezgjahu.
Për ta bërë më të aksesueshme kalanë do të ndërtohet edhe një rrugë e re në shërbim të këmbësorëve, që do të lidhë me Unazën dhe rrugën e “Elbasanit”.
