Rritja e numrit të të prekurve me Koronavirus në Itali, do të thotë për ne shqiptarët se virusi është më pranë se kurrë në vendin tonë.
Deri më tani janë konfirmuar deri në 132 persona të infektuar në vendin fqinj, mes të cilëve dy kanë ndërruar jetë, ndërsa një është shëruar.
Rasti më i fundit i konfirmuar është ai i një 17-vjeçari, i pari rast që infektimi nga virusi ndodh nën moshën mesatare.
Por çfarë duhet të bëjmë ne shqiptarët, tani që virusi vdekjeprurës ndodhet shumë pranë nesh?
Në një kohë që ende nuk ka asnjë të dyshuar në vendin tonë me Koronavirus, e rëndësishme është të mësojmë sesi të sillemi në situata të tilla dhe të jemi të përgatitur për çdo rast!
Së pari, është konfirmuar se rimëkëmbja e individit të prekur me Koronavirus, varet shumë nga sistemi i tij imunitar. Nëse në vendin tonë konfirmohet një rast me Koronavirus, ose edhe nëse jeni një nga ata persona që ju zë shpesh gripi, atëherë duhet të shmangni sa më shumë vendet publike, mes të cilave kinematë, palestrat, kafet.
Nëse shihni një person me shenjat e gripit mundohuni t’i qëndroni sa më larg dhe mos t’ju vijë aspak turp që nuk ia jepni dorën kur e takoni! Kujdesi për veten është primari!
Së dyti, higjiena personale është kryesorja. Lani duart shpesh herë dhe mos e prekni fytyrën, veçanërisht hundën dhe sytë me duart që së pari mund të kenë prekur një sedilje në autobus apo një karrige në një kafene. Kujdes duhet të keni edhe gjatë pazarit në treg, apo supermarket. Ushqimet duhet lahen dhe të zihen shumë mirë gjatë përgatitjes.
Përdorni solucion me alkool për dezinfektimin e duarve kur nuk keni mundësi t’i lani si dhe shami për të mbuluar hundën dhe gojën sa herë që teshtini, ose keni pranë një person me shenja të rrufës dhe gripit.
https://www.instagram.com/p/B86ScNdgGpk/
Së treti, në rast të çdo kontakti të dyshuar me një person që ka ardhur nga vende ku janë shfaqur raste të Koronavirusit, telefoni numrin 127, që është numri i emergjencës kombëtare dhe mos shko në spital, por qëndro në shtëpi pasi përhapja e virusit është shumë e shpejtë.
Gjithashtu nëse ke më pak se 14 ditë që je kthyer nga vendet e prekura dhe ke shenja të sëmundjes duhet të mos dalësh në vende publike, por të telefonosh menjëherë 127-n.
