Autoriteti i Mediave Audiovizive, i njohur si AMA, ka gjobitur katër televizione si “Ora News”, “Report Tv”, “News 24” e “Klan Tv”, lidhur me shkeljet e bëra në emisionet e tyre.
Kështu sa i përket televizionit “Klan”, AMA ka konstatuar shkelje me reklamat dhe komunikimet tregtare në emisionin “Rudina” duke e gjobitur atë me gjobë në vlerën 120,000 (njëqind e njëzet mijë).
Gjithashtu AMA ka vendosur gjobë në vlerën 400,000 (katërqind mijë) lekë, ndaj RTV “Ora News”, për emisionin “Ju flet Moska”, të transmetuar në datën 18 mars 2019, me temën “Skënderbeu dhe vrasjet në xhamitë e Zelandës së Re”. Sipas AMA-s janë bërë deklarime që nxisin intolerancën ndërmjet shtetasve, justifikojnë dhunën, nuk respektojnë gjuhën dhe larminë e traditave, besimeve fetare, kulturës dhe moralit të qytetarëve.
AMA ka vendosur masën admministrative me gjobë në vlerën 200,000 (dyqind mijë) lekë, ndaj Televizionit “Report Tv”, pasi në emisionin “Pa gjurmë”, të datës 14.01.2019, janë dhunuar të drejtat e një fëmije, duke cenuar privatësinë dhe dinjitetin e tij.
Një gjobë në vlerën 120,000 (njëqind e njëzet mijë) lekë është vendosur edhe ndaj Televizionit “News 24”, për edicionin informativ qendror të datës 15.03.2019, ora 19.00, ku u evidentuan dy reklama të fshehta të dhëna njëra pas tjetrës.
Bordi vendos tërheqjen e vëmendjes për televizionin “Ora News”, pasi në emisionin “Why not”, të datës 07.04.2019, ora 19.00, rezulton në shkelje të normave ligjore dhe etike. AMA i referohet puntatës kur Roza Lati dhe Baby G përgatitën një cigare në studio.
Bordi vëren se “fjalori i përdorur gjatë bashkëbisedimit dhe përgatitja e cigareve në studio, para kamerave, promovon përdorimin e duhanit dhe produkteve të tjera të tij, si dhe nxit fëmijët për përdorimin e këtyre produkteve të dëmshme jo vetëm për shëndetin e fëmijëve”. Kjo jo vetëm që dëmton dhe cenon fëmijët, por gjithashtu bie ndesh me ligjin organik dhe Kodin e Transmetimit, i cili detyron OSHMA-të të vendosin shenja paralajmëruese”.
