Një mbrëmje e tensionuar në “MBW Park” të Mynihut përfundoi me emocione të përziera, pasi përballja mes sportistit shqiptar Arijan Topallaj dhe irlandezit Denis Frimpong përfundoi me një skenë shqetësuese.
Topallaj, 26 vjeç, u rrëzua pa ndjenja pas një seri goditjesh të rënda në raundin e tretë, në sekondën e 44-të. Pamjet dramatike treguan momentin kur ai u nxor nga kafazi me barrelë, pasi kishte marrë afro 100 goditje, ndërkohë që kishte arritur të kundërpërgjigjej vetëm me 53.
Frimpong, i përkrahur fuqishëm nga publiku gjerman, shfrytëzoi lodhjen e kundërshtarit për të marrë kontrollin e plotë të ndeshjes. Pas triumfit, ai nuk i përmbajti emocionet dhe shpërtheu në lot, duke zbuluar se kjo fitore kishte një kuptim të veçantë për të: “Javën tjetër bëhem baba,” tha ai mes lotësh, duke e përshkruar këtë si një nga momentet më të mëdha të jetës së tij.
Ndërkohë, Topallaj u dërgua menjëherë në spital për ekzaminime mjekësore. Fatmirësisht, gjendja e tij është e stabilizuar dhe ai është jashtë rrezikut për jetën.
