Nuk kanë munguar provokimet dhe përplasjet në protestën e sotme pas prishjes së Teatrit Kombëtar.
ABC News raporton se është krijuar një situatë e tensionuar për shkak të përlasjeve që ka pasur me disa përfaqësues të Partisë Demokratike.
Këta të fundit kanë mbërritur në protestë ashtu siç lajmëruan nga dje dhe kanë qenë pasivë. Ata kanë nxitur simpatizantët të ishin pjesë e protestës dhe kauzës së artistëve.
Në protestën e Aleancës për mbrojtjen e Teatrit është parë edhe këngëtari Arkimend Lushaj, i njohur si Stresi, i cili u shfaq në një moment gjatë tensionimit të situatës me disa përfaqësues të Vetëvendosjes, sipas FaxWeb.al.
Për shuarjen e tensioneve kanë ndërhyrë të rinjtë e FRPD-së të cilët nuk kanë lejuar agravimin e mëtejshëm të sherrit verbal.
Iconstyle.al ka kontaktuar me reperin dhe është në pritje të një përgjigjeje!
Mjaft protestues nuk e kanë pritur mirë praninë e përfaqësuesve të opozitës dhe mësohet se pati një përplasje pas provokimeve dhe hedhjes së mjeteve pirotektine.
Policia e Shtetit ka ndaluar 49-vjeçarin Arben Qyrani, me banim tek Unaza e Re, Tiranë, autori i hedhjes së lëndëve pirotenike në tubimin e sotëm.
Nga hedhja e dy shashkave pati 2 shtetase të lënduara, mes të cilave edhe një gazetare e cila është lënduar në këmbë.
Pas lëndimit, qytetarë të pranishëm i kanë ardhur në ndihmë asaj duke e mjekuar me betadinë.
Fjalimin përmbyllës të protestës e ka mbajtur regjisori Robert Budina i cili njoftoi protestën e radhës, të mërkurën në orën 17:30.
Ai tha se dita e nesërme do të jetë pushim për shkak se komuniteti musliman feston Natën e Kadrit.
“Protestat do të vazhdojnë. Meqë nesër është një natë e madhe për muslimanët shihemi të mërkurën në orën 17:30”, tha Budina.
/Iconstyle.al
