Ndonëse prej pak vitesh në tregun tonë muzikor, Bardhyl Idrizi i njohur si Bardhi i ka bërë një vend të mirë vetes në këtë industri.
Përpos hiteve të tij, ai njihet edhe si një tekstshkrues shumë i mirë.
Së fundmi artisti nga Kumanova, si rallëherë ka realizuar një intervistë për gazetën “Telegrafi” ku ka zbuluar shumëçka nga jeta dhe planet e tij për vitin 2023.
Telegrafi: Kanë kaluar disa vite prej që je bërë pjesë e estradës shqiptare, si e përkufizon vitin 2022 Bardhyl Idrizi?
Bardhi: “Viti 2022 ka qenë një vit mjaft i mirë për mua. Kam sjell projekte të panumërta, ka pasur dëshpërime, hidhërime por në fund është një gjë e bukur sepse e bëj me dashuri muzikën”.
Telegrafi: Vitin që lamë pas ke sjell një sërë këngësh e bashkëpunimesh, cilën nga këto e vlerëson më shumë?
Bardhi: “Kënga ‘Betohemi’ që nga dita e parë është vlerësuar shumë. Por, mund të them që kënga me Elvana Gjatën dhe DJ GIMI-O ka qenë ndoshta dhe një mrekulli për mua”.
Telegrafi: Bardhi po ashtu ishe shumë i kërkuar në mbrëmje e koncerte, si ndihesh tani para publikut? Çfarë ndjesie ju krijon?
Bardhi: “Para publikut është një ndjenjë shumë e mirë, por tashmë është profesion gjithmonë njëjtë mund të them. Ndoshta në vendlindje kam pasur emocione duke e ditur që jam rritur këtu me një jetë jo edhe aq të mirë, në kushte të vështira”.
Telegrafi: Çfarë mund të ndash nga viti 2022? Ndonjë moment të veçantë që ja vlen të ndani me fansat dhe publikun?
Bardhi: “Në vitin 2022 e kisha ndarë këngën me Elvanën “Ex” pasi ka qarkulluar pa u publikuar akoma me video dhe është bërë hit për tre ditë”.
Telegrafi: Përveç muzikës, në çfarë tjetër ka qenë i fokusuar Bardhi? Keni qenë i përfshirë në ndonjë projekt apo fushë tjetër?
Bardhi: “Për momentin përveç muzikës asgjë, ndoshta një biznes me menaxherin Jetmir Agaj si dhe me producentin Çelik Lipa, por diçka që lidhet me botën e muzikës”.
Telegrafi: Pasi këto vite ke fituar zemrat e publikut dhe një pjese të madhe? A të ka bërë të ndryshosh ndonjë gjë nga vetja?
Bardhi: “Besoj që ua kam fituar zemrat njerëzve me muzikën që bëj dhe sinqeritetin që kam, nuk kam ndryshuar ndonjë gjë”.
Telegrafi: Çfarë ke mësuar nga viti që shkoi?
Bardhi: “Kam mësuar që suksesi nuk duhet të bën të emocionohesh dhe t’i injorosh njerëzit që falë tyre ke arritur suksese”.
Telegrafi: Cilat janë planet e juaja për të ardhmen në muzikë, konkretisht për në vitin e ri?
Bardhi: “Planet e mia në vitin 2023 janë disa bashkëpunime ndërkombëtare me artistët Azet dhe Zunën, dhe më gjerë në Evropë”.
Në fund Bardhi e mbylli me një mesazh për fansat:
“Faleminderit që na dëgjoni, na bëni të ndihem artistë. Normalisht nuk jam më i miri në projekte, por provoj të sjell më të mirën andaj dhe punoj vazhdimisht dhe publikoj shumë këngë”.
