Një trend i pazakontë po përhapet me shpejtësi në rrjetet sociale në Kinë, ku përdoruesit po ndajnë imazhe të yllit amerikan të reality show-t, Kris Jenner, si një mënyrë për të tërhequr fat dhe prosperitet në jetën e tyre.
Gjatë tre ditëve të fundit, qindra mijëra postime janë publikuar në platforma si Weibo dhe RedNote (Xiaohongshu), ku shumë përdorues jo vetëm që shpërndajnë foto të Jenner, por edhe ndryshojnë fotot e profilit të tyre me imazhin e saj, shpesh me tone humoristike dhe kreative.
Kris Jenner, e njohur si menaxherja dhe figura kyçe pas suksesit të familjes Kardashian-Jenner, është bërë papritur një “ikonë fati” për përdoruesit kinezë. Ajo është nëna e Kim, Khloé, Kourtney dhe Rob Kardashian, si dhe Kendall dhe Kylie Jenner, dhe njihet për rolin e saj në ndërtimin e një perandorie mediatike dhe biznesi me vlerë qindra milionë dollarë.
Sipas krijuesit të TikTok, Marcelo Wang, ky trend është “super i rastësishëm”, por ka marrë hov për shkak të respektit që publiku kinez ka për figurat e suksesshme dhe punëtore. Ai theksoi se Kris Jenner shihet si një nga gratë më punëtore në biznes në SHBA.
“Të bësh cosplay me Kris Jenner është një mënyrë qesharake e Gjeneratës Z për të manifestuar suksesin,” u shpreh ai.
Vetë Kris Jenner nuk ka qëndruar indiferente ndaj këtij fenomeni. Ajo ka reaguar në një video të postuar në rrjet, duke shkruar: “Je shumë mirë, zemër!!!!”- një frazë e njohur e saj nga reality show “Keeping Up With the Kardashians”, e cila është bërë shpesh meme në internet.
Raportimet tregojnë se vetëm në platformën RedNote janë publikuar rreth 99,000 postime që përdorin imazhin e Jenner, duke arritur mbi 52.9 milionë shikime. Përdoruesit kanë krijuar versione të ndryshme të saj, duke e paraqitur në role të ndryshme si “avokatja Kris”, “mësuesja Kris” apo figura të tjera profesionale.
Fenomeni është përhapur gjithashtu në Douyin, versioni kinez i TikTok, ku videot që përdorin apo shpjegojnë trendin kanë grumbulluar qindra mijëra shikime në vetëm pak ditë.
Edhe pse aktualisht ky fenomen mbetet kryesisht brenda rrjeteve kineze, ai ka filluar të shfaqet edhe në platforma perëndimore si X (ish-Twitter). Madje, një përdorues ka pretenduar se ka kaluar një provim pasi vendosi foton e Kris Jenner si profil – një tjetër dëshmi e ndikimit viral të këtij trendi.
Ky fenomen tregon edhe një herë fuqinë e rrjeteve sociale për të kthyer figura publike në simbole të papritura kulturore këtë herë, si një “magnet” për fat dhe sukses.
