Kryeja e testeve të shpejta është parë si mënyrë për të parandaluar përhapjen e virusit. Në shumë vende ka nisur bërja e testeve të shpejta, ku ekipe specialistësh dalin në rrugë dhe kryejnë testimet e njerëzve.
Sakaq, këto testime të shpejta për koronavirusin do të nisin dhe në Shqipëri ditën e hënë, siç ka lajmëruar ditën e sotme ministrja e Shëndetësisë Ogerta Manastirliu.
Sipas saj deri tani janë siguruar 100 mijë teste të shpejta dhe se prej datës 20 dhjetor do të shtrihet ky lloj testimi edhe në spitalet rajonale.
Ndërkohë, shefja e Departamentit të Sëmundjeve Infektive në Institutin e Shëndetit Publik, Silva Bino ka treguar se testi bëhet tek persona që janë në 5 ditët e para të infektimit dhe se rezultati del për 30 minuta.
Mbrëmjen e sotme mjeku epidemiolog Rexhep Muja ka demostruar live në studion e “Radar Informativ” si bëhet një test i shpejtë. Moderatorja e emisionit, Jonida Shehu iu nënshtrua testit, ndërsa përgjigja nuk vonon më shumë se 20 minuta.
Epidemiologu sqaroi se janë trajnuar për këto teste, ndërsa thotë se fillimisht marrin të dhënat e pacientit që të mos ketë ngatërresa.
“Fillimisht marrim të dhënat e pacientit. Përgjigja vjen për 20-30 minuta. Shënohen të dhënat që të kemi saktësi. Futet tamponi në hundë. Më pas e lëmë të qetë. Kemi bërë trajnime për testet e shpejta. Fillimisht do të nisim me Tiranën pastaj në rrethe. Për 30 minuta i hedhim të gjitha të dhënat në panel”, shpjegoi ai.
