Të gjitha nuset që janë në kërkim të fustanit të bardhë ideal për ditën e dasmës, tashmë e kanë muzën e tyre. Paraqitja Meghan Markle në dasmën mbretërore me Princin Harry, do të influencojë në zgjedhjet e tyre dhe të stilistëve në vitet në vijim.
Kjo pasi ajo u cilësua si një nga nuset më të thjeshta mbretërore që na kanë zënë sytë. Modeli i flokëve, fustani apo dhe fakti që kishte bërë një makijazh shumë natyral, e bënë Meghan të dukej super e thjeshtë. Ne po ju sjellim sot një përmbledhje të gjithçkaje që duhet të dini për paraqitjen e Meghan Markle në ditën e dasmës, nga fustani deri të grimi:
Fustani
Fustani i bardhë minimalist është projektuar nga Clive Waight Keller, një stiliste britanike, dhe drejtoresha e parë femër në shtëpinë e famshme të modës franceze “Givenchy”. Meghan zgjodhi stilisten Keller për të vetmen arsye: “për veshjet e saj të përjetshme, elegante dhe të përsosura”.
Fustani i dasmës u frymëzua nga ai i Princeshës Angela të Lihtenshtajnit, e cila e veshi në dasmën e saj në vitin 2000. Ajo është panameze dhe personi i parë me prejardhje afrikane që u martua me një anëtar të një dinastie evropiane mbretërore.
Ndërsa fustani i dytë akoma më elegant, ishte stiluar nga Stella McCartney.
Bizhuteritë
Ajo që na ra në sy menjëherë sapo pamë Meghan në altar, ishte kurora e saj me diamante, që shkëlqente. Meghan vendosi një kurorë që i përkiste Mbretëreshës Mary, bashkëshortja e Mbretit Xhorxh V, e cila e bleu këtë bizhuteri prej diamanti nga argjendaria luksoze në Londër, Garrard, në vitin 1925. Pas vdekjes së saj, kurora u trashëgua nga nusja e saj, Princesha Marina, Dukesha e Kentit. Motra e Mbretëreshës Elizabeth, Princesha Margaret, gjithashtu e ka pasur kurorën.
Kurora është e përbërë nga gurë diamanti dhe platini dhe është e ndarë në 11 seksione, me gurë në formë ovale të madhësive të ndryshme. Qendra e kurorës është një vepër e vërtetë arti e krijuar nga 10 diamante brilante.
Meghan mbante gjithashtu një palë vathë diamanti nga “Galanterie de Cartier”, argjenderia franceze Cartier, së bashku me një byzylyk diamanti “Reflection de Cartier” në dorën e saj të djathtë.
Dhe në fund por jo më pak të rëndësishmet, unazat që kushtuan mbi 11 mijë dollarë, janë të dizajnuara nga Cleave dhe Company, e njëjta kompani që dizenjoi unazën e fejesës së Meghanit në vitin 2017, sipas CNN.
Unaza e Meghan është prej ari nga Uellsi, siç është tradita e dasmës mbretërore që filloi në vitin 1923 me Nënën Mbretëreshë. Ari ishte një dhuratë nga Mbretëresha.
Ndërsa Harry mbajti një unazë platini edhe pse ai mund të mos e mbajë nëse nuk dëshiron. Princi William nuk ka mbajtur asnjëherë një unazë martese. Princi Philip, Duka i Edinburgut dhe bashkëshorti i Mbretëreshës Elizabetë, nuk e mbajnë unazën. Kjo pasi aristokratët nuk e kanë bërë historikisht këtë gjë. Megjithatë disa anëtarë meshkujt të mbretërisë e mbajnë dhe njëri prej tyre është Princi Charles. Me sa duket Harry do të ndjekë shembullin e të atit.
Makijazhi dhe flokët
Ajo që u diskutua më tepër në paraqitjen e Meghan Markle, ishte thjeshtësia dhe natyraliteti. Makijazhi i lehtë e bënte Meghan të dukej sikur nuk kishte asnjë pikë grimi në fytyrë.
Por në fakt e vërteta është se për këtë makijazh janë harxhuar mijëra dollarë. Vetëm për grimin dhe flokët janë harxhuar mbi 18 mijë dollarë.
Shpenzime të tjera
“Vogue” shkruan se vetëm për veshjet e shoqërueseve të nuses e dhëndrit janë harxhuar afër 30 mijë dollarë, ndërsa muaji i mjaltit çiftit do t’i kushtojë 221,172 mijë dollarë.
Shpenzimet më të mëdha janë bërë për sigurimin, rreth 42 milionë dollarë. Gjithsej për dasmën janë shpenzuar mbi 45 milionë dollarë.
/Iconstyle.al
