Megan Kerrigan Byron, bashkëshortja e ish-CEO-së së kompanisë teknologjike “Astronomer”, Andy Byron, ka marrë një vendim drastik pas një skandali publik që përfshiu të shoqin. Ajo është larguar nga vila e tyre në Northborough, Massachusetts, një pronë me vlerë rreth 2.4 milionë dollarë dhe është zhvendosur në Kennebunk, Maine, një zonë e qetë dhe luksoze rreth 170 kilometra larg, me qëllimin për të shmangur vëmendjen mediatike.
Shkak për këtë ndryshim të papritur është bërë një video e përhapur masivisht në rrjetet sociale, ku Andy Byron shihet në një moment intim me Kristin Cabot, drejtoreshën e burimeve njerëzore në të njëjtën kompani, gjatë një koncerti të Coldplay. Pamjet u shfaqën në ekranin gjigant të skenës dhe janë parë mbi 125 milionë herë.
Përballë kësaj situate delikate, Megan nuk ka bërë asnjë reagim publik, por veprimet e saj në rrjete sociale flasin vetë: ajo hoqi mbiemrin “Byron” nga profili i saj në Facebook dhe më pas e çaktivizoi plotësisht llogarinë. Më parë, profili i saj ishte plot me kujtime nga jeta familjare dhe momentet e lumtura me dy djemtë që ka me Andy-n.
Burime për “Daily Mail” raportojnë se ajo aktualisht është e rrethuar nga mbështetja e familjes, përfshirë edhe motrën e saj më të madhe, Maurën.
Në anën tjetër, kompania “Astronomer” ka ndërmarrë veprime të menjëhershme pas skandalit. Andy Byron ka dhënë dorëheqjen, e cila është pranuar nga bordi, ndërsa drejtimin e përkohshëm të kompanisë e ka marrë bashkëthemeluesi Pete DeJoy.
