Nga aktrimi në politikë, me siguri duhet të jetë një rrugë e vështirë për t’u ndjekur, por jo për një 28-vjeçar shqiptar.
Klement Tinaj ka hyrë në garën për guvernator të Kalifornisë si kandidat demokrat. Ai ka luajtur në disa filma të Hollivudit, ndërsa është edhe pronar i disa bizneseve të vogla, për të cilat shpreson të sjellë eksperiencën e tij personale nëse fiton garën.
Në një intervistë për VOA, Tinaj ka treguar se qëllimi i tij është të kontribuojë për ëndrrën amerikane, pasi sipas tij, Amerika është i vetmi vend ku ëndrrat bëhen realitet.
“Mund të ëndërrosh ç’të duash dhe ta bësh atë realitet nëse ke guximin për ta ndjekur ëndrrën dhe për të ndjekur pasionin që ke. Unë kam qenë dikur në industrinë e filmit, kam edhe dy shkolla në Los Anxheles, që janë pronë e imja. Kam edhe disa biznese të vogla, jam pronar i festivalit të filmit United International, që është festivali i njëqindtë më i mirë i filmit në botë. Pra, kur i hyra garës për guvernator, pikërisht kjo më frymëzoi, sepse 50 për qind e banorëve të këtushëm punësohen nga bizneset e vogla. Duke qenë pronar biznesesh të vogla, unë e di mirë se sa të vështirë e kanë njerëzit dhe kush vuan më shumë, sidomos njerëzit me ngjyrë dhe komunitetet e varfra”.
Edhe pse shumë i ri në moshë, shqiptari i parë që konkurron për guvernator në Kaliforni, shprehet se ka besim se do t’ia dalë me sukses në këtë garë, pasi mosha është thjesht një numër:
“Njerëzit duan ndryshim, ata kërkojnë gjak të ri. Ata kërkojnë dikë që është i ri dhe që ka një vizion krejt të ri dhe ide të freskëta. Pikërisht kjo është ajo sjell unë në këtë garë. Nëse njeriu ka vizionin dhe energjinë e duhur, mosha është thjesht një numër.
Rëndësi ka të kesh një vizion dhe platformë të mirë, së cilës t’i përmbahesh dhe t’i besosh. Vërtet që jam kandidati më i ri në garën për guvernator dhe jam shqiptari i parë, por nuk është kjo që më kualifikon për këtë post”.
Zgjedhjet brenda Partisë Demokrate mbahen më 5 qershor, ndërsa zgjedhjet për guvernatorin më 6 nëntor 2018.
