Instituti i Shëndetit Publik ka treguar përmes një dokumenti drejtuar Ministrisë së Shëndetësisë, se nuk ka kapacitete mjaftueshëm për testime masive të popullsisë për COVID-19, ndaj duhet të certifikohen laboratore private për të ofruar këtë shërbim.
Kjo do të thotë se me shumë gjasa, shteti mund t’ia adresojë privatit këtë shërbim dhe ndryshe nga institucionet shtetërore që e ofrojnë falas, mund të na duhet të paguajmë.
Legjislacioni shqiptar parashikon se në rast epidemie, diagnoza dhe kura për të sëmurët duhet të ofrohet pa diskriminim dhe falas, si nga institucionet publike, ashtu dhe nga ato private. Por duke qenë se intitucionet ende nuk e kanë zgjidhur këtë pjesë, me sa duket do të na duhet të paguajmë për një test koronavirusi.
Por sa mund të kushtojë ky test?
Laboratori Intermedica, i cili është vetëofruar për t’u certifikuar ka bërë me dije se kostoja e testimit me PCR mund të përllogaritet afërsisht 150-160 €.
Sipas News 24, kostoja e testimit me serologji për çdo antikorp shkon afërsisht 4000-5000 lekë të rinj. Praktika e deritanishme ka treguar se është e mjaftueshme IgG ( një lloj antikorpi) për të parë nëse je pozitiv ose jo me COVID-19.
Iconstyle.al ka kontaktuar me ISHP-në për një reagim në lidhje me testimet, por ende është në pritje të një përgjigjeje.
Në prill, Prokuroria e Tiranës nisi hetimet ndaj Spitalit Amerikan pas një kallzimi të bërë nga Policia e Shtetit, për mashtrimet që subjekti po u bënte qytetarëve shqiptarë me testet për COVID-19.
Burime për “iconstyle.al” konfirmuan asokohe se testet në Spitalin Amerikan nisën të realizoheshin dhe me një çmim abuziv që varionte mes 300-400 euro (lexo këtu).
Agjencia Kombëtare e Barnave dhe Pajisjeve Mjekësore reagoi duke bërë të ditur se përveç strukturave shtetërore, asnjë subjekt tjetër privat nuk është i certifikuar për të kryer testimin e COVID-19.
Aktualisht nuk ka një reagim zyrtar në lidhje me ndonjë laborator të certifikuar, ndërsa pritet që kjo të mësohet sa më shpejt!
