Një tjetër fundjavë po kalon dhe bashkë me të edhe neglizhenca e madhe e policisë në bregdetin e jugut, aty ku festa vijon pavarësisht se jemi në mes të një pandemie!
Pamjet e fundit na vijnë sërish nga Dhërmiu, aty ku muzika pas orës 20:00 dhe festat vijojnë, ndërkohë që lokalet e dasmave në Tiranë, apo Durrës gjobiten çdo ditë.
Në videon e mëposhtme njerëzit shihen pranë njëri-tjetrit, pa respektuar distancën duke dëgjuar muzikë, ndërkohë që policia po vijon të merret me bizneset e vogla, të cilat po mundohen të ngrejnë sadopak kokën pas pandemisë, duke qenë se janë lënë në harresë nga qeveria.
Mbetet e pashpjegueshme sesi po kryhen këto ndërhyrje për gjobitjen e disa bizneseve dhe lënien e lirë të disa të tjerëve. Aq më tepër që Policia vijon të bëjë publike gjobat selektive në media si të ishin veprime heroike, vetëm për të treguar se aksioni vijon.
Por nga ana tetër, nuk po bën asgjë ndaj këtyre bizneseve në bregdet që vijojnë aktivitetin e tyre sikur të mos kishte ndodhur asgjë! Por a nuk është akti normativ për të gjithë?!
Më 20 korrik, ministrja e Shëndetësisë shprehej: “Akti normativ ndalon muzikën pas orës 20.00 në të gjithë mjediset e shërbimeve të çfarëdolloji. Mosrespektimi i këtij detyrimi nga subjektet, dënohet me gjobë 1 000 000 lekë dhe në rast përsëritje, me pezullim te aktivitetit për një periudhë gjashtë mujore”.
Ky vendim u mor pas konstatimit se klubet e natës janë kthyer në vendgrumbullime të rinjsh, ku injorohet dhe sfidohet totalisht zbatimi i masave të domosdoshme, për parandalimin e përhapjes së Covid-19, duke i shndërruar në vatra potenciale infeksioni.
Por sot jemi në datën 6 shtator, dhe shkeljet vijojnë. Mjafton të shohësh party-t në rrjetet sociale për të kuptuar se askush nuk po tregohet i përgjegjshëm, as të rinjtë e mbledhur grumbull, as pronarët e këtyre lokaleve dhe për më tepër as policia që vijon të mbyllë sytë ndaj shkeljeve të tilla.
“Iconstyle.al” ka raportuar gjithmonë me pamje rastet kur resortet apo lokalet vijojnë të pashqetësuar muzikën pas mesnate nën hundën policisë, si rasti te Mali i Robit i pak ditëve më parë (shiko këtu).
Ministri Sandër Lleshaj bashkë me profesionistët e PR-it në Policinë e Shtetit, po reklamojnë me zë të lartë çdo ditë rastet e gjobitjes së bizneseve familjare në hall në kushte krizë, ndërkohë kur është fjala për të mëdhenjtë, policia bëhet e verbër ndaj abuzimeve.
/Iconstyle.al
