Nëntetarja Zarife Hasanaj, e cila ndërroi jetë në krye të detyrës gjatë misionit të NATO-s në Letoni, është shpallur “Dëshmore e Atdheut”.
Ministrja e Mbrojtjes ua dha lajmin personalisht familjarëve të ushtarakes që humbi jetën.
Ministrja e Mbrojtjes Olta Xhaçka me të mbërritur në Shqipëri, vizitoi familjen e nëntetares Zarife Hasanaj, në Babrru.
Pas kthimit nga Letonia ku u mbajtën ceremoni nderimi për ushtaraken shqiptare të rënë në krye të detyrës gjatë misionit, Xhaçka ngushëlloi familjarët, duke i ofruar mbështetjen e saj për çdo nevojë.
“Dhimbja juaj është edhe e jona. Jeni pjesë e familjes së madhe ushtarake. Do keni mbështetjen tonë për çdo nevojë. Ndarja nga jeta e Zarifes është humbje e madhe për të gjithë ne.” u shpreh ajo.
Ndërkohë, të premten, 10 Maj, ora 10 – 11:30 në hollin e Pallatit të Kongreseve do të zhvillohen homazhet për nder të efektives së FA dhe në 11:45 – 12:30 ceremonia shtetërore me pjesëmarrjen e përfaqësuesve të lartë të shtetit, po te Pallati i Kongreseve.
