Djali i kryeministrit Edi Rama dhe aktores së njohur Matilda Makoçi ka rrëfyer ndikimin që kanë pasur prindërit e tij në formimin e karrierës së tij artistike.
Në një intervistë për “Report tv”, Greg Rama foli për instiktin e nënës së tij për ta nxitur të merret me art, që doli të jetë i vërtetë, pasi ai është tashmë pjesë e artit figurativ.
“Të kesh dy prindër artistë është dhe nuk është shumë e vështirë. Por, unë mendoj se jam me fat për të dy, pasi kanë ndikuar që të merrem me këtë punë. Që i vogël ime më donte që të merresha me art, edhe pse unë s’mendoja kështu. Por ja ku jemi edhe mesa duket ka dalë instinkti i nënës”, rrëfen Gregu.
Greg Rama çeli ekspozitën “Ex Nihilo” në galerinë e Fakultetit të Arteve të Bukura, që është frymëzuar nga rëndësia e përditshmërisë, detajeve të thjeshta që shpesh, qëllimisht ose jo, zhvlerësohen.
“Kjo ekspozitë ka lindur nga asgjëja. Ideja ishte për t’i dhënë kuptim diçkaje që në dukje është shumë e vogël dhe e parëndësishme, por pas një reflektimi kupton se të gjitha gjërat e vogla në dukje, gëzojnë një rëndësi të veçantë për ne, për vetëdijen tonë edhe për mënyrën se si ne e shikojmë botën edhe jetën”, shpjegon Greg Rama.
Dje, në një intervistë për “Euronews.al”, Greg Rama u shpreh se ndarja nga jeta e mikeshës së tij Kristi Reci nga tërmeti i nëntorit, ndikoi tmerrësisht shumë tek ai dhe krijimtaria e tij (lexo këtu).
“Ka ndikuar tmerrësisht shumë tek unë, dhe tek krijimtaria ime. Kristi ka qenë një mikeshë dhe më shumë se kaq. E gjithë kjo histori portalesh, lajmesh…në rregull, unë e mirëkuptoj. Nuk ka qenë aspak me qëllime të këqija, por më vjen keq që në shumë raste është neglizhuar pjesa që shpirti i saj dhe i atyre që ikën bashkë me të, të lihet i qetë”.
