Ata që nuk kanë mbushur moshën 18 vjeç, shumë shpejt nuk do të lejohen që të frekuentojnë klubet e natës.
Këtë vendim kryeministri Edi Rama e njoftoi sot nga qyteti i Kukësit, pas mbledhjes së qeverisë.
Rama bëri të ditur se ata që nuk kanë mbushur të 18-tat nuk mund të hynë në lokalet e natës, përjashtuar rastet kur janë të shoqëruar nga prindërit ose mësuesit.
“Mbyllja e rrjetit të pikave të basteve në qytete është njëra anë, por ana tjetër është mbrojtja e adoleshentëve nga alkooli. Duhet një masë drastike në bashkëpunim me shkollën dhe prindërit. Do të ndalohet frekuentimi i personave që janë nën 18 vjeç në lokalet e natës. Hyrja e tyre do të mundësohet vetëm kur janë të shoqëruar me prindër apo mësues, në rast të kundërt nuk do të ketë asnjë tolerim. Kjo nismë do të arrihet deri në mbylljen e lokaleve deri në një periudhë 1-vjeçare, duke u bërë të pamundur dhe dhënien me qira të ambienteve, për ata që nuk i zbatojnë rregullat”, tha Rama.
Pak kohë më parë kryeministri njoftoi iniciativën për ndalimin e pijeve energjike dhe atyre me sheqer të shtuar, për personat nën 18 vjeç.
