Nuk është kënga e tij e parë dhe nëse jeni fans të Kastro Zizos do ta keni me siguri imazh të parë. Thamë imazhin dhe jo emrin, pasi më parë e keni njohur si Herodion, ndërsa tani do ta njihni me emrin e tij të vërtetë Erion Beqo.
Ai rikthehet pas dy vitesh mungesë me këngën më të fundit të titulluar “2” dhe vendosi të bënte këtë ndryshim në emrin e tij, me këtë arsye:
“Nëse një artist dëshiron të bëjë një ndryshim në art apo të japë një mesazh të caktuar, duhet ta bëjë me identitetin e tij të parë. Prandaj u riktheva me Erion Beqo”.
Dhe ndërsa mund t’iu japë idenë e një mashkulli të ftohtë, Erioni na tregon se për të nuk është e vështirë ta vendos veten në rrethin e personave emocional.
“Si artist frymëzohem shumë nga dashuria, sepse nuk është diçka aq e thjeshtë sa mund të duket”, shprehet gjatë intervistës për “Iconstyle.al”.
Erioni është nga ata artistë të rinj që duan të fitojnë famën dhe pëlqimin e publikut vetëm duke punuar, ndërsa veç zërit, ka edhe talent shkrimin e teksteve.
Nuk ka patur asnjë mbështetje nga këngëtarët e tjerë të njohur, por kjo nuk e ka bërë të ndalojë së ndjekuri ëndrrën e tij. Gjatë intervistës për “Iconstyle.al” ai na tregon të pathënat e “biznesit” të muzikës dhe ku do ta shohim shumë shpejt.
Kënga juaj më e fundit titullohet thjesht “2”! Mund të quhet një dedikim dashurie?
Projekti im 2 nuk mund të quhet dedikim dashurie, por sigurisht që mund të quhet një këngë dashurie. Besoj që vjeshta e jep ndikimin e vet tek çdo artist dhe unë personalisht bëhem pak më shumë emotiv gjatë kësaj periudhe. Mendimi im për dashurinë është i treguar qartë dhe në titullin e këngës #2. Mendoj se të jesh 2 është më mirë sesa të jesh vetëm. “Mjafton t’jena 2”…..dhe gjithçka është më e lehtë.
Lidhet me diçka personale?
Nuk ka lidhje të drejtpërdrejtë me jetën time personale, sepse nëse bazohemi vetëm tek vetja një artist shteron shumë shpejt. Është e bazuar në jetën time patjetër, por teksti ka fjalë që çdo mashkull duhet t’ia thotë femrës që dashuron.
Teksti është realizuar nga ju, nga e merr frymëzimin për të shkruar këngë?
Kam patur gjithmonë aftësinë për të shkruar sikur edhe në momente pa frymëzim. Por ky tekst ka ardhur shumë natyrshëm, pa sforcim mendor apo emocional, sepse thelbi i tij është DASHURIA. Por në përgjithësi frymëzohem nga jeta ime, situatat që më rrethojnë apo edhe nga 1 fjalë e vetme.
Klipi ka më shume një imazh të zymtë, ka ndonjë arsye?
Klipi ka më shumë ngjyra të vjeshtës, por mund ta quajmë dhe të zymtë, sepse na paralajmëron për një stinë akoma dhe më të egër. Nga ana artistike na tregon që në dashuri ka vështirësi, por nuk duhet të frikësohemi para asgjëje.
Kushton shumë të bësh një këngë bashkë me klipin sot…
Unë personalisht kam punuar me djem të rinj në treg dhe kemi shfrytëzuar dhe miqësinë me njëri-tjetrin dhe nuk i kam prekur shifrat ekstreme të këtij tregu jo dhe aq të pëlqyer nga ana ime. Në Shqipëri të famshëm të bën paraja dhe jo talenti, sepse shifra minimale që mund të ketë një projekt i kalon 1 milion lekë të vjetra dhe për ekonominë tonë është shumë e lartë. Prandaj dhe arti jonë është në gjendjen e sotme.
Ke patur një këngë me Kastron, i vështirë apo jo bashkëpunimi me të?
Kastro është i vjetër në treg dhe në mënyrë indirekte mësova goxha prej tij. Kemi të dy një karakter të fortë dhe nuk përputhemi lehtë në mendime, por rëndësi ka që bëmë një projekt goxha të mirë. I jam mirënjohës për mbështetjen që më ka dhënë.
A ke patur mbështetje nga artistët e njohur?
Unë kam bërë 3 projekte. Projekti “E gjuj për 3”, që ishte projekt mjaft i mirë, ku unë flas për jetën time nuk pata mbështetje. Projekti “Parfum” me Kastron pata pak për shkak se ishte ai i pranishëm. Përsa i përket projektit të fundit mbetet të shihet, sepse është fillimi, por që të gjithë dyert duan çelësa mjaft të shtrenjtë. (qesh)
Hasin më shumë pengesa apo marrin më shumë mbështetje artistit e rinj në vendin tonë?
Në Shqipëri hasin goxha pengesa madje dhe nga ata njerëz apo media që janë të destinuara të mbështesin artistët e rinj. Arsyet nuk u kuptoj po besoj që kjo është arsyeja kryesore e degradimit të artit shqiptar. Në Kosovë mendoj që është më ndryshe. Ka vend tregu për ata që punojnë.
A kanë përfitime artistët e rinj nga këngët që publikojnë?
Fjala përfitim për ne nuk ekziston në fillim. Unë personalisht mendoj që të jap maksimumin në një projekt që t’i pëlqejë publikut. Të marr shikime dhe pëlqime reale. Dhe si fillim kënaqësia nga këto gjëra është fitimi momental. Koncertet janë ato që e mbajnë një artist.
Pse nuk të kemi parë në asnjë kompeticion muzikor? A ke plan në të ardhmen?
Nuk jam shfaqur në asnjë kompeticion muzike më parë dhe arsyeja ka qenë mjaft e thjeshtë. Kam analizuar shumë këngëtar/e dhe projektet e tyre dhe mënyrën sesi i fitojnë çmimet. Prandaj jam stepur pak. Por besoj se vitin e ardhshëm do të vij me një projekt goxha të mirë, me të cilin kam nisur të punoj.
Do të shohim së shpejti me projekte të reja muzikore?
Projekte janë diku 4 ose 5 që do të lançohen deri në verë. Po punoj goxha me idetë, sepse nuk dua të jem një artist i zakonshëm ose reper klishesh.
