Ditën e djeshme, një nga mediat më të njohura botërore “Vice” ka realizuar një video investigative në të cilën heton trafikantët e kokainës që kanë punuar me mafian shqiptare.
Një prej intervistave fokusohej tek historia e një trafikanti të dënuar, i cili ka ndarë hollësisht disa nga përvojat e tij me shqiptarët.
I pyetur se pse pseudonimi i tij është “Lucky”(Fatlumi), ai ka treguar se si ka shpëtuar prej sulmeve e plumbave të shumtë, teksa është rrëfyer se shqiptarët i kanë vrarë familjarët e njerëzit e tij të afërt.
Mirëpo, gjatë gjithë këtij rrëfimi, një informacion i pavërtetë është thënë dhe ka kaluar pa u vënë re dhe pa u studiuar nga media amerikane.
Trafikanti ka thënë se gruaja e mikut të tij është vrarë me gurë, dhe me vendosmëri është shprehur se kjo gjë është një ligj në Shqipëri.
“Dy vite më parë shqiptarët vranë shokun tim dhe gruan e tij. Me gurë. Ashtu është ligji andej. Ata e qëlluan në kurriz shokun tim dhe i vranë gruan me gurë.”- kanë qenë fjalët e tij, ndërkohë që ky pretendim është publikuar pa iu studiuar vërtetësia.
Ky desinformim shkakton një dëm të madh mbi reputacionin e Shqipërisë, duke nxitur frikë e duke e bërë atë të duket si një vend i rrezikshëm për t’u vizituar.
Intervista të tilla me një influencë të madhe botërore të postuara nga media prestigjoze, duhet domosdoshmërisht të zhvillojnë një hulumtim paraprak, për të shmangur keqkuptime dhe keqinformime të cilat ndikojnë drejtpërdrejt në mënyrën se si vendi ynë shihet në botë.
