Koleksioni i ri i ‘Gucci”-t i punuar me mjeshtëri nga Alessandro Michele, u prezantua dje në një sfilatë verbuese në Muzeun Capitolini në Romë.
Themi verbuese pasi të ftuarit vështirë se mund të shihnin ndonjë nga krijimet e tij, nëse nuk kishin një elektrik dore.
Sfilata u bë e gjitha në errësirë, e cila duket të jetë tashmë një metodë origjinale e Michele-s për shfaqjet e tij.
Të pranishmit u inkurajuan të përdorin elektrikë dore për të ndriçuar pasarelën ku kalonin modelet.
Megjithatë Michele kishte një shpjegim për këtë veçori të sfilatës së tij:
“Të punosh në modë është sikur të jesh një arkeolog dhe të zbulosh gjëra. Elektriku i dorës ndihmon në gjetjen e gjërave që nuk mund të shohësh dhe me atë ti vendos se çfarë do të shohësh dhe ku do ta drejtosh dritën – sidomos këtu në këtë vend mrekullish. Kur isha fëmijë, nuk më pëlqenin parqet, këndet e lojërave apo futbolli, dhe erdha këtu me babanë tim. Që atëherë dhe tani e dua arkeologjinë dhe artin, jam i fiksuar me botën antike, është si një sëmundje për të cilën nuk ka ilaç, besoj “.
Veshjet e tij i përkisnin stilit të viteve ’70 dhe përcillnin të gjitha një mesazh të fuqishëm, atë të lirisë.
