Më 27 mars kryeministri i Britanisë së Madhe Boris Johnson rezultoi me COVID-19 dhe beteja e tij me virusin vdekjeprurës nuk ishte aspak e lehtë.
Ai jo vetëm që u shtrua në spital, por përfundoi në terapi intensive, duke qenë në prag të vdekjes, por fatmirësisht ia doli të mbijetonte.
Ai la spitalin më 12 prill duke treguar më pas edhe betejën e vështirë dhe pasojat që la tek ai virusi, të cilin nuk e mori seriozisht në fillim, duke e pësuar vetë nga veprimet e pamenduar që mori si kryeministër.
Ndërkohë, këtë të dielë ai u izolua sërish sepse kishte patur kontakte me një deputet të infektuar.
Johnson iu nënshtrua tamponit dhe ka rezultuar negativ, por do të qëndrojë i izoluar për 14 ditë. Kjo pasi rregullat e qeverisë parashikojnë se personat në kontakt të ngushtë me një person të infektuar duhet të karantinohen për dy javë.
Kryeministria ka deklaruar se ai u testua duke përdorur një test të shpejtë që nuk ka nevojë të përpunohet në një laborator.
Boris ka thënë se nuk ka asnjë simptomë dhe do të vazhdojë të drejtojë qeverinë, duke mbajtur video konferenca.
