Pasi iu përgjigj urdhërit të Ministrisë së Shëndetësisë dhe Mbrojtjes Sociale duke pezulluar aktivitetet futbollistike në vend, FSHF i ka dërguar një letër Këshillit të Ministrave.
Federata kërkon mbështetje financiare për komunitetin e futbollit në vendin tonë, duke qenë se është në prag falimentimi për shkak të krizës së Covid-19.
Klubet, shkollat dhe akademitë kanë ndaluar punën e tyre, ndaj është e pamundur që momentalisht të bëhen pagesa, pasi edhe sponsorat janë tërhequr.
Federata e Futbollit kërkon që të gjithë punonjësit e sektorit të futbollit në vend të përfshihen në paketën e kompensimit, si një e drejtë themelore për të garantuar mbijetesën e familjeve të tyre në këtë kohë të vështirë.
Ditën e sotme, në përditësimin e të dhënave nga Ministria e Shëndetësisë, u konfirmuan 223 raste të infektuara, si dhe 11 jetë të humbura për shkak të Covid-19.
