Tregoni të drejtën! Sa herë e keni injoruar në lokale mbishkrimin “mos hidhni letra në tualet” dhe keni shkarkuar ujin e WC-së si rebelë të vërtetë, duke përjetuar një adrenalinë të vogël nga frika se mos ndodh ndonjë bllokim dhe uji fillon të dalë si shatërvan. Më lini t’jua them unë: PAFUND! Dhe një gjë e tillë duket fare normale duke qenë se vetë letrat higjienike janë ndërtuar në mënyrë të tillë që të jenë të tretshme në ujë (e keni parasysh që me një letër higjienike të lagur nuk fshin dot as një majë këpuce se të ngel në dorë).
Por, mesa duket kjo nuk është dhe aq ide e mirë. Ndërkohë që në shumë vende të botës hedhja e letrave higjienike në tualet është diçka mëse normale, në vendin tonë gjërat qëndrojnë disi ndryshe.
Pas një kërkimi online, “iconstyle.al” ka zbuluar se thuajse në të gjitha shtetet rreth nesh si Greqia, Mali i Zi dhe Maqedonia, është e ndaluar hedhja e letrave në tualet dhe kjo për shkak se rrjeti i kanalizimeve nuk e përballon dot një gjë të tillë. Në këtë listë nuk përfshihej Shqipëria ndaj dhe për të qartësuar dyshimet tona, “iconstyle.al” kontaktoi një kompani shqiptare të specializuar në shërbime hidraulike, që na theu përgjithmonë ëndrrat për të hedhur qoftë dhe njëherë tjetër letrat higjienike në WC.
Sipas përfaqësuesit të kompanisë, një gjë e tillë nuk është e sugjerueshme për dy arsye madhore. Së pari sepse ndryshe nga ç’mendonim, letrat higjienike nuk qenkan dhe AQ të tretshme, çka do të thotë se ndonëse përsojnë një lloj shpërbërjeje, sërish ato bëhen pjesë e mbetjeve të ngurta që shkaktojnë bllokime të kanalizimeve. Kështu që nëse hidhni letra në tualet, ju së bashku me një punëtor disi përtac të Bashkisë jeni shkaktarë të atyre përmbytjeve që ndodhin në Tiranë sapo bie pak shi dhe uji fillon të dalë nga pusetat.
Dhe arsyeja e dytë, është se në zona të caktuara ujrat e kanalizimeve, për tmerrin tonë, derdhen ende në det dhe prania e letrave higjienike në këto ujra kontribuon edhe më shumë në dëmin e jashtëzakonshëm zinxhir që i shkaktohet mjedisit. Ndaj derisa autoritet të ndërgjegjësohen për të bërë punën e tyre siç duhet, le ta nisim nga vetja jonë duke ndihmuar sado pak në ruajten e qyteteve tona nga ndotja duke mos hedhur më letra higjienike në tualet.
