Mesatarja e foshnjave që lindën me defekt në vitin 2017 ishte 14 bebe për 1000 lindje të gjalla.
Instituti i Shëndetit Publik ka kryer një studim për vitin 2017 dhe tregon se foshnjat e lindura me problematika ishin gjithsej 436.
Numri më i madh i fëmijëve me anomali ishin nga rajoni i Tiranës dhe ai i Gjirokastrës, përkatësisht 29.1 dhe 18.2 për 1000 lindje.
Ndërsa numër më të ulët kishin rajonet e Shkodrës dhe Dibrës, përkatësisht 2.1 dhe 3.6 për 1000 lindje
Studimi vendas mbi anomalitë në lindje përfshin vetëm të dhënat nga maternitetet dhe jo defektet që janë evidentuar më pas gjatë periudhës foshnjore në pediatri.
Nga të dhënat e studimit të Institutit të Shëndetit Publik shihet se rreth 57% e foshnjave të raportuara me Defekte të Lindura (DL) banojnë në zona urbane. 62% e foshnjave me DL janë meshkuj. Studimi gjeti se rreth 52% e nënave të foshnjave me DL kanë 8 vjet ose më pak vite arsimimi.
Nënat të cilat janë mbi 35 vjeç kanë më shumë mundësi që të sjellin në jetë një fëmijë me anomali.
Burimi: Monitor
