Elvana Gjata është larguar në Gjermani për arsye shëndetësore. Ky është shkaku i largimit sipas këngëtares shqiptare, pas vrasjes në ish-Bllok, ku ishte i përfshirë i fejuari i saj.
Kjo është zbuluar në letrën dërguar nga këngëtarja për Prokurorinë, nga “Report Tv”. Elvana Gjata ka statusin e dëshmitares dhe ndaj saj nuk ka masë sigurie.
Thuhet se ajo e ka dërguar letrën tri javë më parë përmes postës, ku citohet të ketë shkruar:
“Ndodhem jashtë vendit për arsye shëndetësore, jam njohur nga mediat se kërkoni dëshminë time. Sapo te jem në Shqipëri do të paraqitem për te dhënë deklarimet e mia”.
Gjithashtu thuhet se sipas hetimeve të policisë dhe prokurorisë rezulton se këngëtarja s’ka qenë e pranishme në momentet kur ndodhi konflikti, ku si pasojë një person mbeti i vdekur dhe dy të tjerë të plagosur, më 4 tetor.
Gjykata e Tiranës lëshoi dje një vendim ku u kërkon të gjitha pikave doganore në Shqipëri që të ndalojnë Elvana Gjatën dhe ta sjellin atë për të dëshmuar lidhur me vrasjen e ish-Bllokut. Vendimi i Gjykatës ka ardhur pasi ka përfunduar afati 30 ditor që këngëtarja e njohur të paraqitej vetë për të dhënë deklaratën e saj.
