Për të parandaluar përhapjen e koronavirusit në vend, qeveria ka vendosur disa masa të rrepta, të cilat kanë sjellë shumë pakënaqësi.
Kjo pasi ka disa kategori, të cilat e kanë me të vërtetë të nevojshme të dalin në mënyrë që të kryejnë disa aktivitet nga të cilat nuk mund të heqin dot dorë.
I tillë është edhe rasti i fëmijëve aitikë, të cilët është e vështirë t’i mbash mbyllur për 24 orë.
Prandaj, në Ditën Botërore të Autizmit, Klubi Kombëtar i fëmijëve me spektrin e autizmit i ka dërguar një letër Ministrisë së Shëndetësisë dhe i ka bërë një kërkesë të veçantë.
Ata kërkojnë që për këta fëmijë të ketë një ora tjetër të caktuar për të dalë pas orës 13:00, kur nuk ka më lëvizje.
Egla Bajrami, drejtoreshë ekzekutive e Club-it Kombëtar sqaroi për “Report TV” përmbajtjen e kësaj letre për të cilën pritet një përgjigje:
”Është shumë e vështirë për prindërit. Fëmijët e tyre duan të dalin kërkojnë me patjetër, pasi nuk e kuptojnë këtë situatë. Duan të hapin derën. Ne i kemi dërguar një letër Ministrisë së Shëndetësisë, ditën e sotme nisur nga shqetësimi i prindërve, të ketë një dalje të këtyre fëmijëve në fashën kur nuk ka lëvizje. Letrën e kemi bërë për fëmijët në të gjithë Shqipërinë, për liri dalje pas orës 13:00. Presim nkë përgjigje. Ministria ia ka komunikuar policisë. Në Tiranë na kërkuan një listë. Tirana ka 2000 të deklaruar me spektrin autik. Ndoshta shifra është edhe më e madhe. Ju bëj apel prindërve të referojnë rastet e tyre për trajtim më të specializuar. Ne kemi kërkuar këtë liri-dalje pas orës 13:00 për fëmijët me spektrin e autizmit shoqëruar nga prindërit e tyre”.
